VI «Наше время – Безнең заман» эшләүче яшьләр фестиваленә гаризалар кабул итү башланды
Гаризалар 2018 елның 25 сентябренә кадәр кабул ителә. Татарстанның оешма һәм предприятиеләре фестивальдә катнашу өчен команда яки аерым катнашучыларны җибәрә ала. Алар «Музыкаль юнәлеш», «Бию юнәлеше», «Дан минуты», «Оешманың визитка-презентациясе» (визитканы командалар гына әзерли) номинацияләрендә көч сынаша.
Командаларга 18-35 яшьлек эшче яшьләр җыела. Бәйге программасы төрләре алар өчен һөнәри эшчәнлек булырга тиеш түгел. Фестивальдә катнашу бушлай.
Һәр этапта да катнашучылар өчен Россия һәм Татарстанның әйдәп баручы мөгаллимнәре белән мастер-класслар оештырыла. Командалар һәм аерым катнашучылар кыйммәтле бүләкләр, дипломнар, акчалата премияләр белән бүләкләнә. Җиңүче команда (гран-при иясе) 250 000 сум күләмендә акчалата бүләккә һәм Татарстан Президенты күчмә кубогына ия булачак.
Фестиваль 2013 елдан бирле уздырылып килә. Аның төп максаты – эшче яшьләрнең рухи һәм интеллектуаль байлыгын һәм сәләтләрен ачу; яшьләрнең социаль адаптация дәрәҗәсен күтәрү; белемнәрен һәм гамәли күнекмәләрен камилләштерү өчен мөмкинлекләрне киңәйтү.