Дамир Фаттахов Татарстан халыклары яшьләр ассамблеясы турында: «Сез – республика халыкларының дус һәм килешеп яшәве үрнәге»
Татарстан халыклары яшьләр ассамблеясы активистлары бүген үз проектларын ТР яшьләр эшләре министры Дамир Фаттаховка тәкъдим итте.
Оешма эшчәнлеге белән Яшьләр ассамблеясы җитәкчесе Тимур Кадыйров таныштырды. «Безнең вәкиллекләр республиканың 7 районында эшләп килә: Әлмәт, Бөгелмә, Алабуга, Түбән Кама, Минзәлә, Нурлат һәм Чистай районнарында, 2018 ел ахырына кадәр Менделеевск, Тәтеш һәм Тукай районнарында тагын 3 вәкиллек ачу планлаштырыла».
Очрашуда катнашучылар - төрле милләт вәкилләре, алар чит ил студентлары өчен уздырыла торган чаралар турында сөйләде: «Чит ил студенты көне» фестивале, «Дөнья энҗесе» матурлык конкурсы, милли спорт төрләре буенча спартакиада һ.б.
Шулай ук республикакүләм проектлар да оештырыла: «Халыклар дуслыгы – Татарстан байлыгы» мәгариф форумы, Россия халыклары телләрендә җырлар конкурсы, «Татарстан мәдәни мозаикасы» фестивале, «Халыклар дуслыгы парады», «Муви» форумы-театры, «Многоликий Татарстан» фотокүргәзмәсе.
Очрашуга йомгак ясап, Дамир Фаттахов мондый эшчәнлекнең мөһимлеген билгеләп үтте: «Сез – республика халыкларының дус һәм килешеп яшәве үрнәге».