Татарстанда өченче тапкыр «XXI гасыр лидеры»конкурсы узачак
5-10 сентябрьдә Казанда узачак «Озын тәнәфес» Бөтенроссия конкурсының ярымфиналы - «XXI гасыр лидеры» Бөтенроссия балалар һәм яшьләр иҗтимагый оешмалары лидерлары һәм җитәкчеләре арасында Бөтенроссия конкурсы финалын оештыру һәм уздыру буенча конференция узды.
Конкурс балалар һәм яшьләр иҗтимагый хәрәкәтләрен үстерүгә, иҗтимагый оешмалар өчен кадрлар әзерләүгә, шулай ук Россия Федерациясендә яшьләрнең һөнәри үзбилгеләнеше системасын үстерүгә юнәлдерелгән.
Татарстан Республикасы Премьер-министры урынбасары Ләйлә Ринат кызы үзенең сәламләү сүзендә Россиядәге балалар һәм яшьләр иҗтимагый берләшмәләренең иҗтимагый һәм гомумдәүләт әһәмиятен билгеләп үтте: «Иҗтимагый берләшмәләргә ярдәм итүнең төп һәм мотивацион рәвешләренең берсе-Россия Федерациясендә 2002 елдан гамәлгә ашырыла торган «XXI гасыр лидеры» балалар һәм яшьләр иҗтимагый берләшмәләре лидерлары һәм җитәкчеләре конкурсын үткәрү. Шуңа бәйле рәвештә аны хаклы рәвештә зур тарихлы һәм инде ныклап оешкан традицияле конкурс дип санарга мөмкин. Татарстан Республикасы конкурсны өченче мәртәбә каршылый. Элегерәк 2008 һәм 2017 елларда үткәргән иде».
Конкурста Россия Федерациясенең 70 субъектыннан 500дән артык катнашучы, 200дән артык спикер, кунак һәм эксперт катнашачак. Алар арасында 14 яшьтән 17 яшькә кадәрге активистлар һәм иҗтимагый берләшмәләр лидерлары бар.
Шулай ук Тимур Сөләйманов, Татарстан Республикасы Яшьләр эшләре министры, «XXI гасыр лидеры» – Россиянең балалар һәм яшьләр иҗтимагый оешмалары лидерлары арасында иң кирәкле конкурсларның берсе булуын билгеләп үтте. «Бу конкурс безнең өчен бик үзенчәлекле, чөнки ул яшьләр сәясәте өлкәсендәге профессиональ кадрларны ачыклау, укыту һәм әзерләү өчен уникаль мәйданчык булып тора. Моннан тыш, 2022 ел юбилей елы-20че булачак! Рөстәм Миңнеханов ярдәме һәм аның балалар хәрәкәтен үстерүдә кызыксынуы аркасында конкурсның 20 җиңүчесе Татарстан Республикасы Президентыннан акчалата премиягә ия булачак. Бүген бу 14-17 яшьлек кыз-егетләр һәм алар үзләре артыннан яшьтәшләр командасын алып барыр һәм, яшереп тормыйм, без якындагы елларда Россиянең иң актив яшьләрен үз студент киләчәк үсеше өчен нәкъ менә Татарстанны сайлар дип өметләнәбез!»
«Алда билгеләп үтелгәнчә, быел без 14-17 яшьтә 500дән артык катнашучы көтәбез. Шуны әйтәсем килә, бәйгенең күпьеллык тарихы тәҗрибәсе буенча, ул конкурсның иң көчле яшь номинацияләренең берсе. Биредә һәрвакыт сәламәт көндәшлек һәм чын дуслык бар, иң ихлас хис - тойгылар һәм җиңүгә мотивация сизелә», - дип ассызыклады «Татарстан Республикасы балалар оешмалары советы» төбәк иҗтимагый оешмасы директоры Еатерина Согрина.
«СДО активистлары зурларның ышанычы өчен рәхмәт белдерә һәм безнең оешмада иң мөһиме – балалар булуын акларга тырыша. Без балалар белән яңалыкларны күзәтәбез һәм Татарстан Республикасы балалар оешмалары Советының Россиянең яңа балалар һәм яшьләр хәрәкәтен гамәлгә куючылар составына керүе белән бик горурланабыз. Быел конкурста катнашучыларның үз төбәкләренең иң яхшы тәҗрибәләре турында сөйләү һәм «Яңа хәрәкәт – яңа мөмкинлекләр» эшлекле уенында яңа оешма үсешенә идеяләр тәкъдим итү мөмкинлеге булачак», - дип өстәде «Татарстан Республикасы балалар оешмалары Советы» иҗтимагый оешмасы рәисе Зилә Хәбибуллина.
Соңыннан Ләйлә Ринат кызы конкурста катнашучыларга уңышлар теләп калды: «Хәерле юл, аралашудан, үз эшчәнлекләрегездән бары яхшы тәэсирләр алырга язсын.Якын кешеңә, ярдәмеңә мохтаҗ кешегә файда китерсәң, шундый тирән рәхәтлек хисе тоясың. Бу үз-үзеңне камилләштерү һәм фантастик бәхет хисе. Сезнең көчегезне, талантыгызны тикшерүче барлык конкурсларда катнашудан курыкмагыз, бу сезнең XXI гасыр лидеры икәнегезне тагын бер кат исбатлый».