Татарстанда 2022 елда балалар өчен ышаныч телефонына 23 меңгә якын мөрәҗәгать килгән
2022 елда Татарстанда балалар ышаныч телефонына 23 меңгә якын шалтырату килгән, бу узган ел мөрәҗәгатьләр белән чагыштырганда 7,5% ка күбрәк. Бу хакта ТР Яшьләр эшләре министры Тимур Сөләйманов хәбәр итте. Министр билгеләп үткәнчә, 2021 елда 21314 продуктив мөрәҗәгать кабул ителгән.
Балаларның яшьтәшләре белән мөнәсәбәтләре мәсьәләләре буенча мөрәҗәгатьләр тематикасы өстенлек итә – 3525 шалтырату, баланың ата – анасы белән мөнәсәбәтләре мәсьәләләре буенча-3494 шалтырату. Шулай ук бала белән рәхимсез мөгамәлә буенча сораулар да актуаль: гаиләдә – 101 шалтырату, гаиләдән тыш – 18 шалтырату, яшьтәшләр арасында – 32 шалтырату. Баланы системалы рәвештә рәнҗетү (буллинг), интернет-янаулар, уку проблемалары һ. б. мәсьәләләр буенча сораулар да бар.
Агымдагы елның октябрендә Татарстанда 8-800-5552-220 бердәм номерлы яшьләр ышаныч телефоны да эшли башлады. Өч ай эчендә бу номерга 968 кеше мөрәҗәгать итте.
«Бу юнәлештә безнең төп бурычыбыз – яшүсмерне үз тәҗрибәләре белән ялгыз калдырмау. Яшьләр психологик-педагогик ярдәм үзәкләренә дә, бердәм номерлар буенча да бушлай консультация сорап мөрәҗәгать итә ала. Яшьләр белән профессиональ психологлар эшләячәк», - диде Тимур Сөләйманов.
Ведомство башлыгы шулай ук цифрлы психологик ярдәм хезмәтен эшләтеп җибәрүне анонслады: «Психологик ярдәмнең цифрлы хезмәте прототибы эшләнде, аның кысаларында яшьләр сәясәте психологларына онлайн-форматта эләгергә мөмкин булачак».
Проект Татарстан Республикасы Президенты тарафыннан хупланды. Киләсе елда язда башлап җибәрү планлаштырыла.
Ул искәрткәнчә, психологик-педагогик ярдәм үзәкләре белгечләре ел дәвамында укулар уза һәм үз квалификацияләрен күтәрә. Әйтик, «Навигатор» республика үзәге, Мәскәү дәүләт психология-педагогика университеты белән берлектә, «Кризис хәлләрендә психологик ярдәм күрсәтү» квалификациясен күтәрү курсларын оештырды, анда онлайн-форматта 7 районнан 32 кеше катнашты. Шулай ук Татарстан Республикасы югары белем бирү оешмаларының психологик хезмәтләренең 22 психологы һәм педагог-психологлары өчен супервизия өйрәтүе кысаларында онлайн-лекцияләр узды. «Россия Кызыл Хач» бөтенроссия иҗтимагый оешмасы педагог-психологлар, клиник психологлар һәм яшьләр сәясәте учреждениеләре психологлары өчен укулар үткәрде. Өстәмә әзерлек узган югары белемле психологлар, шул исәптән мобилизацияләнгән гаиләләр дә эшли.