ТР Яшьләр министрлыгы Татарстан студентының социологик портретын төзиячәк
ТР Яшьләр эшләре министрлыгы республика студентлары арасында аноним онлайн-сораштыру үткәрде. Анда алар үз тәкъдимнәре һәм уку вакытында килеп чыккан проблемалы сораулары белән уртаклаша алалар. Бу хакта КФУ укучылары белән очрашуда ТР Яшьләр эшләре министры Ринат Садыйков хәбәр итте.
Мондый сораштыру студентның кызыксынулары, мавыгулары, сораулары белән портретын ясарга ярдәм итәчәк. Сораштыру нәтиҗәләре буенча уку йортларындагы коллегаларыбыз һәм студентлар белән бергә актуаль сорауларны хәл итү юлларын эзләячәкбез», – дип белдерде ул.
Ринат Садыйков студентлар белән ачык диалог форматында беренче очрашу үткәрде. Киләчәктә мондый чаралар даими булачак. Укучылар министрга үз теләкләрен һәм тәкъдимнәрен әйтә, шулай ук кызыклы сораулар бирә алачаклар.
«Без студентлар аудиториясе белән ачык диалог форматында очрашулар циклына старт бирдек. Беренче очрашу Казан федераль университеты – Россиядә генә түгел, бөтен дөньяда танылган фән, мәгариф һәм мәдәният үзәкләренең берсендә узды. Бүген университетта төрле эшчәнлек юнәлешләре буенча 100 дән артык студентлар берләшмәсе бар. Бу эш безнең студентларга барлык өлкәләрдә дә зур биеклекләргә ирешергә мөмкинлек бирә», - дип ассызыклады министр.
Министрлык эшчәнлеген презентацияләүдән тыш, студентлар үз уңышлары турында да сөйләде. Алар иҗтимагый әһәмиятле проектларны тормышка ашыру тәҗрибәләре һәм студентлар җәмгыятен үстерү буенча идеяләре белән уртаклаштылар.
Әңгәмәнең беренче блогы остазлык темасына багышланган иде. Җәмәгать оешмалары һәм кураторлык институты белән эшләү бүлеге начальнигы Гөлназ Мәрданова сүзләренчә, КФУда ел саен 60-70 яшь укытучы куратор була. Ул академик төркемнәр кураторлары белән системалы эш төзүнең мөһимлеген билгеләп үтте, университетта аларның саны 800дән артык.
Үз чиратында, студентлар да кураторның студентны тәкъдим итә, көйли ала һәм тиеш кеше булуын билгеләп үттеләр һәм бу юнәлештә эшне көчәйтергә тәкъдим иттеләр.
Икенче блок кысаларында экология һәм табигатьтән файдалану институтының 3 нче курс студенты, Универсиада авылының 13 нче номерлы йортының студентлар советы рәисе Сергей Токарев КФУ тулай тораклары конкурсы мисалында чит шәһәрләрдән килгән укучылар белән эшләү үзенчәлекләре, аларны адаптацияләү һәм иҗтимагый эшчәнлеккә җәлеп итү турында сөйләде.
Исегезгә төшерәбез, быел министрлыкның өстенлекле бурычларының берсе – студент яшьләре белән аралашу.
Казан университеты КФУ Президенты Рияз Минзарипов исеменнән тәкъдим ителде. Чарада шулай ук яшьләр сәясәте һәм тәрбия эшчәнлеге буенча проректор Ариф Межведилов, КФУның яшьләр сәясәте буенча департаменты директоры Юлия Виноградова катнашты.