Татарстанлылар «Туган илең турында дөньяга сөйлә» конкурсына 30лап эш җибәргән
Бөтен Россия буйлап «Туган илең турында дөньяга сөйлә» конкурсы бара. Биредә яшьләр ил тормышындагы кызыклы мизгелләр темасына видеоязмалар ясыйлар һәм текстлар язалар. Татарстандан барлыгы 28 эш килгән.
Түбән Камадан Данияр Саримов үз шәһәренең үсеше һәм истәлекле урыннары турында сөйләде. Казаннан Богдан Моряшов яраткан республикасы турында шигырь укыды. Түбән Камадан Василий Бадгиева һәм Зарина Морадымова керәшен кызы - Екатерина Николаевна Стрелкова белән таныштылар. Ул кызларга яшь чагында үзе кигән традицион киемнәрне күрсәтте. Ә Лениногорск егетләре командасы «Туган илең турында дөньяга сөйлә» номинациясендә эш әзерләде һәм туган шәһәренең төп истәлекле урыннары турында сөйләде. Конкурста катнашучыларның эшләре белән безнең социаль челтәрләрдә танышырга мөмкин.
«Туган илең турында дөньяга сөйлә» - балаларны һәм яшьләрне патриотик тәрбияләүгә, үсеп килүче буында туган якка карата мәхәббәт һәм хөрмәт хисе формалаштыруга, шулай ук милләтара дуслык мөнәсәбәтләрен үстерүгә юнәлдерелгән конкурс.
Ел саен катнашучыларның эшләре Интернет челтәрендә, шулай ук эре дәүләт һәм җәмәгать мәйданчыкларында басыла. Гаризалар кабул итү һәм нәтиҗәләр ясау тәмамланганнан соң, иң яхшы эшләрнең авторлары Мәскәүгә дәүләт һәм җәмәгать эшлеклеләре, яшьләр оешмалары җитәкчеләре, бизнес-берләшмәләр вәкилләре һәм мактаулы кунаклар катнашында бүләкләү тантанасына чакырылачак.