2023 елда Татарстанда лагерьларны ремонтлауга 1,35 млрд. сум тотылачак
Татарстан Республикасында лагерьлар инфраструктурасына зур басым ясала. 2019 елдан Татарстан Республикасында «Җәй – балаларга» балалар һәм яшьләрнең ял итү һәм сәламәтләндерү учреждениеләрен капиталь ремонтлау, реконструкцияләү һәм төзү программасы эшли.
«2023 елда программага 14 муниципаль берәмлектә 1,35 млрд.сум финанслау белән 15 лагерь кертелгән, шуларның 13ндә лагерь буенча төзелеш-монтаж эшләрен башкару, 2се буенча проект-смета документациясен эшләү планлаштырылган», - дип билгеләп үтте ТР Яшьләр эшләре министры Ринат Садыйков.
Аның сүзләренчә, 2019-2022 елларда 29 балалар сәламәтләндерү лагеры капиталь ремонтланган, реконструкцияләнгән һәм төзелгән. Аларның гомуми суммасы 4,3 млрд.сум тәшкил итә. Ремонт барышында корылмалар, инженерлык челтәрләре төзелеше дә, капиталь ремонт та бара, лагерьларны җиһазландыру да бара.
Мәсәлән, быел капиталь ремонттан соң ике лагерь ачу планлаштырыла. Әтнә муниципаль районының беренче «Чулпан» балалар сәламәтләндерү лагеры. Лагерь озак вакыт тузган булу сәбәпле эшләми. Ашханә, 4 йокы корпусы, медицина пункты, клуб, сакчы йорты, койма капиталь ремонтлана, спорт мәйданчыгы, санитар узел төзелә, территория төзекләндерелә, кирәкле җиһазлар сатып алына.
Быел лагерьда өч смена - бер 7 көнлек смена һәм 18 көнлек ике смена үткәрү планлаштырыла.
Татарстан Республикасы Транспорт һәм юл хуҗалыгы министрлыгы белән берлектә 2019 елдан «Гомуми файдаланудагы автомобиль юлларыннан алып балалар һәм яшьләрнең ял итү һәм сәламәтләндерү учреждениеләренә кадәр керү юлларын ремонтлау» программасы гамәлгә ашырыла.
«Хәзерге вакытта 51 сәламәтләндерү лагерына керү юллары ремонтланган, 2022 елда 6 лагерьга керү юллары ремонтланган. 2023 елда 5 лагерьга юлларны ремонтлау буенча 250 млн.сумлык эшләр бара», - дип йомгаклады министр.