Татарстан яшьләре «Россия Студентлар язы» XXXI Бөтенроссия фестиваленә юл тотты
26 майдан 1 июньгә кадәр Татарстан яшьләре составында 96 кеше Пермьдә узачак «Россия Студентлар язы» XXXI Бөтенроссия фестивалендә катнашырга юл тотты.
Татарстан яшьләре үзләренең конкурс номерларын күрсәтәчәк. Шулай ук беренче тапкыр «ТР Студентлар язы-2023»Республика студентлар иҗаты фестиваленең Гала - концертында күрсәтелгән төбәк концерт программасын тәкъдим итәчәк.
Фестивальдә студентлар республика данын 10 юнәлештә яклаячак: «региональ программа», «вокал», «инструменталь», «бию», «театр», «оригиналь жанр», «Мода», «Медиа», «Видео», «Арт».
Фестивальдә Пермьдә илнең барлык почмакларыннан диярлек 3,5 мең югары уку йорты студенты катнашачак. Татарстан Республикасы делегациясе составында 10 югары белем бирү уку йортыннан 96 талантлы катнашучы җыелды.
«Ел саен Татарстан делегациясе зур бүләкләр алып кайта. Бу ел да искәрмә булмаячак дип уйлыйм. Балалар тырышып эшләделәр, үз номерларын әзерләделәр. Алар региональ этапта ук лаеклы әзерлек дәрәҗәсен күрсәттеләр. Катнашучыларга уңышлар телим, алар барысы да 100% һәм лаеклы урыннарга ия булсыннар. Яшьләр өчен бу үзләрен күрсәтү генә түгел, яңа танышулар булдыру, тәҗрибә уртаклашу мөмкинлеге дә», - дип билгеләп үтте ТР Яшьләр эшләре министры Ринат Садыйков.
Фестивальнең оештыручылары-Россия Федерациясе Фән һәм югары белем бирү Министрлыгы, «Россия яшьләр берлеге» гомумроссия иҗтимагый оешмасы һәм Пермь крае Хөкүмәте. Фестиваль яшьләр эшләре буенча Федераль агентлык (Росмолодежь) һәм «Россия – мөмкинлекләр иле» Президент платформасы ярдәме белән узачак.
Программа яшьләрнең үз-үзләрен нәтиҗәле үстерү өчен шартлар тудыруга юнәлдерелгән, бу исә Мәгариф милли проектының бурычларына җавап бирә.