«Сәләт» форумында «Асыл гаилә» очрашуы узды
Шушы көннәрдә «Сәләт» форумына «Асылташ» мәктәбе, «Бәләкәч» клубының әти-әниләре һәм балалары, шулай ук берничә буын Сәләт белән бәйле гаиләләр килде. 154 катнашучы - 44 гаилә форум атмосферасына чумды һәм Биләр җирендә бергә вакыт үткәрде.
Очрашу «Асыл гаилә»проекты кысаларында узды. Аның максаты-Сәләт гаиләләренең үзара хезмәттәшлеге өчен мәйданчык булдыру, «Асылташ» мәктәбе һәм «Бәләкәч» клубы балаларын форум киңлеге белән таныштыру, шулай ук катнашучыларның күпкырлы үсеше өчен шартлар тудыру.
Катнашучыларны Сәләт башлыгы, ТР Рәисе ярдәмчесе, «Беренче хәрәкәте» яшьләр хәрәкәтенең төбәк бүлеге советы рәисе Тимур Сөләйманов сәламләде.
«Мин Сәләткә беренче тапкыр 1994 елда килдем. Шул вакыттан бирле күп нәрсә үзгәрде. Ел саен Сәләт үсә һәм камилләшә, шартлар яхшыра бара. Сәләт балалар тарафыннан төзелә. Безнең бурыч-дөрес атмосфера булдыру, аларга күпкырлы үсеш өчен барлык кирәкле шартларны тәэмин итү, чөнки нәкъ менә балалар киләчәктә дә безнең эшне дәвам итәчәк», — дип уртаклашты ул.
Шулай ук Тимур Сөләйманов Рәис Рөстәм Миңнехановка Сәләт җәмгыятен үстерүгә керткән өлеше өчен рәхмәт белдерде.
«2006 елда ук, премьер-министр булганда, Рөстәм Нургалиевич безнең лагерьга килде. Аның беренче сүзләре: «Әгәр мин үзем бу урынга бармасам, беркайчан да ышанмас идем. Бу балаларга үсәргә һәм камилләшергә ярдәм итүче махсус атмосфера», — диде ул.
Тимур Сөләйманов сүзләренчә, беренче Сәләт лагере 1994 елда Арчада узган, анда нибары 65 бала булган. Бүгенге көндә лагерьлар саны 30га кадәр артты, ә ел саен Сәләт проектларында 20 меңнән артык кеше катнаша. Сәләт балаларга үз сәләтләрен күрсәтергә ярдәм итүче фестивальләр, мәгариф сменалары, интеллектуаль турнирлар, иҗади конкурслар һәм башка проектлар оештыра.
«Асыл гаилә» кысаларында форумга үз гаиләсе белән Сәләт активисты, җырчы, КФУның икътисади теория һәм эконометрия кафедрасы доценты Ләйсән Арсентьева килде.
Мин кечкенә чакта балаларымның киләчәктә: «Ә без Биләргә кайчан барачакбыз?» - дип сораячакларын күз алдына да китерә алмадым. Бу минем җанымны җылыта. Минем өчен монда үз гаиләм белән килү зур бәхет. Мин монда бала, җитәкче, әйдаман, укытучы булганымны хәтерлим — без үзебез шушы палаткаларда үстек, ә Биләр җире һәм Сәләт минем йөрәгемдә аерым урын алып тора», - дип уртаклашты ул.
«Асыл гаилә» кысаларында балалар һәм өлкәннәр өчен мастер-класслар, спорт уеннары һәм татар мәдәниятенә багышланган иҗади чаралар узды.
Иҗади дәресләр вакытында катнашучылар бергәләп «Асылташ» мәктәбе эмблемасын ясадылар. «Асыл ярыш» кысаларында балалар һәм аларның әти-әниләре милли татар уеннары буенча турнирда катнаштылар. Кич белән гаиләләр «CалаваТIK» татар балалар төркеме белән бергә «Корылтай» сәхнәсендә үзләренең иҗади сәләтләрен күрсәттеләр.