Казанның XXX ел «Беренче курс студентлары көне» фестиваленең Гала-концерты 25 ноябрьдә узачак

Казанның XXX ел «Беренче курс студентлары көне» фестиваленең Гала-концерты 25 ноябрь көнне КФУның «УНИКС» КСКда 17:00 сәгатьтә узачак. Анда биш юнәлештә җиңүчеләр (музыкаль, бию, театр, оригиналь жанр һәм Медиа) һәм гран-при ияләре билгеләнәчәк.

Россия Президенты Владимир Путинның 2023 елны «Педагог һәм остаз елы» дип игълан итүенә бәйле рәвештә, фестивальнең «Эстрада җыры (Ватан җыры)», «Заманча бию», «Кече формалар театры», «Эстрада миниатюрасы», «Эстрада монологы», «Күләгәләр театры» һәм «Яктылык театры» номинацияләрендә махсус «Педагог һәм остаз елы» номинациясе бар.

1500 катнашучы арасында гомуми зачетта иң күп балл җыйган белем бирү оешмаларының «Платина өчлеге» билгеләнәчәк, шулай ук фестивальнең 85 номинациясендә җиңүчеләр билгеләнәчәк.

9-14 ноябрь югары уку йортлары өчен 5 юнәлеш буенча сайлап алу сынаулары узды (музыкаль, бию, театр, оригиналь жанр һәм Медиа), анда студентлар биремнәрне үтәделәр һәм үзләренең иҗади номерларын юнәлешләр буенча тәкъдим иттеләр. Катнашучыларны РФ һәм ТР атказанган артистлары, ТР атказанган мәдәният хезмәткәрләре, сценаристлар, шоу-программалар алып баручылар, режиссерлар һәм креатив индустрияләр вәкилләре бәяләде.

Исегезгә төшерәбез, фестиваль Казан муниципаль берәмлеге башкарма комитеты тарафыннан Казанның балалар һәм яшьләр эшләре комитеты, Казан шәһәре югары уку йортларының студентлар клублары белән эшләү бүлеге, А.Гайдар исемендәге Казан яшьләр үзәге һәм Казан югары уку йортлары администрацияләре тарафыннан үткәрелә.