Бу җәйдә Татарстаннан 13 меңнән артык бала палаткалы лагерьларда ял итәчәк
Чатыр лагерьларында бу җәйдә Татарстаннан 13 меңнән артык бала һәм яшүсмер ял итәчәк.
«Быел палаткалы лагерь-спутниклар инфраструктурасын үстерүгә 50 млн сумнан артык – республика бюджетыннан 43 млн сумнан артык, Россия Федерациясе субъектларында яшьләр сәясәтен комплекслы үстерү программасы буенча федераль бюджеттан 7 млн сум бүлеп бирелде. Палаткалы лагерь-спутникларның гомуми колачын 800 кешегә арттырырга планлаштырабыз, җәйге чорда палаткалы лагерьларда 13 меңнән артык бала һәм яшүсмер ял итәчәк», – дип сөйләде ТР Яшьләр эшләре министры Ринат Садыйков.
Чатыр лагерьлары Яшел Үзән, Балык Бистәсе, Азнакай, Мамадыш районнарында эшләячәк.
Традиция буенча Биләр тыюлыгы территориясендә иң зур палаткалы лагерь - «Сәләт» форумы оештырылачак, анда 2 меңнән артык бала катнашачак.