Буыннарны берләштерү: Яшьләр көненең төп темасы-2024 «Гаилә елы»на багышланган
Казанда Яшьләр көнен үткәрүнең төп мәйданчыгы булып традицион рәвештә «УРАМ» экстрим-паркы торачак. Фестиваль 29 июньдә узачак һәм бер көн дәвам итәчәк. Мәйданчыклар иртәнге сәгать 10да эшли башлаячак, ә җәйнең иң масштаблы фестивале 22.00 сәгатьтә бәйрәм концерты белән тәмамланачак.
«Ел саен июньнең соңгы шимбәсендә без Бөтенроссия Яшьләр көнен билгеләп үтәбез. Республиканың барлык районнарында һәм шәһәрләрендә яшьләр өчен төрле кызыклы һәм файдалы активлыклар узачак. Быел фестивальнең төп темасы Россиядә Гаилә елына багышланган, төп йөкләмәсе – төрле буыннарны берләштерү. Фестиваль чын гаилә бәйрәме булачак. Биредә яшьләр дә, өлкәннәр дә күңелләренә хуш килгән дәресләр таба алачак», - дип билгеләп үтте ТР Яшьләр эшләре министры Ринат Садыйков.
Фестиваль сигез тематик линия буенча мәйданчыкларны берләштерәчәк:
• «Иҗат белән бергә»: иҗади яшьләр чыгышы, мастер-класслар, фикер лидерларыннан ачык микрофоннар;
• «Белем белән бергә»: белем бирү лекцияләре һәм мастер-класслар;
• «Яңа белән бергә»: блогерлык буенча мастер-класслар, контент булдыру һәм социаль челтәрләр белән эшләү өчен зоналар;
• «Үз эшең белән бергә»: яшь эшмәкәрләр маркеты, акселератор Росмолодежь.Грантлар;
• «Ватан белән бергә»: партнерлык чаралары һәм акцияләре;
• «Карьера белән бергә»: карьера консультацияләре, вакансияләр ярминкәсе, әңгәмәләр, профессиональ карьера конкурслары һәм проектлары презентациясе;
• «Актив яшәү рәвеше белән бергә»: контестлар, мастер-класслар, күрсәткеч чыгышлар, турнирлар һәм чемпионатлар;
• «Яхшылык белән бергә»: волонтерлык акцияләре, ирекле проектлар һәм оешмалар зоналары.
Спорт программасы кысаларында фестивальдә самокат, воркаут, стритбол, роликлар, паркур, волейбол, теннис һәм джиу-джитсу буенча контестлар (ярышлар) планлаштырылган. Шулай ук «УРАМ» экстрим-паркы мәйданчыгында BMX буенча Россия чемпионаты һәм 3х3 баскетбол буенча Татарстан Республикасы Чемпионаты узачак.
Яшь эшкуарлар үз брендларын маркетта тәкъдим итә алачак, бу кече бизнес өчен үзләре турында сөйләү, шулай ук яңа аудиториягә үз товарларын һәм хезмәтләрен тәкъдим итү өчен яхшы мөмкинлек булачак. Катнашу өчен 14 июньгә кадәр яшьләр көненең рәсми сайтында гариза бирергә кирәк.
Фестиваль концерт программасы һәм музыкаль хедлайнер чыгышы белән тәмамланачак. Җирле артистлар өчен программаның концерт өлешендә катнашу өчен open-call ачык. 14 июньгә кадәр Фестиваль сайтында гариза бирергә мөмкин.
Тамашачылар һәм катнашучылар өчен чараларга керү алдан теркәлү буенча ирекле: деньмолодежи2024.рф. фестивальнең төп программасы шунда ук басылып чыгачак. Шулай ук барлык актуаль һәм җентекле мәгълүмат социаль челтәрләрдә – «Яшьләр көне | Татарстан» Телеграм-каналында һәм «ВКонтакте» да «Татарстан яшьләре» битендә урнаштырылачак.
«УРАМ» экстрим-паркының социаль челтәрләрендә спорт ярышларына теркәлү: https://t.me/uramextremepark | https://vk.com/urampark
Казанда Яшьләр көне яшьләр эшләре буенча Федераль агентлык (Росмолодежь), Татарстан Республикасы Хөкүмәте һәм ТР Яшьләр эшләре министрлыгы ярдәме белән «УРАМ» Яшьләр экстрим-паркы мәйданчыгында үткәрелә.