ТР Молпарламентының яңа составын сайлауда катнашу өчен гаризалар кабул итү башланды
Татарстан Республикасы Яшьләр парламентына сайлаулар башланды. Гаризаны 18 августка кадәр бирергә мөмкин. Барлыгы составына йөз кеше керәчәк: районнардан һәм шәһәр округларыннан – 45, оешмалардан-35 һәм 20 үз-үзен тәкъдим итүче. Тавыш бирү алдыннан кандидатларга берничә этап узарга туры киләчәк, шул исәптән дебатлар һәм үз сайлау алды кампаниясен нигезләү. Бу хакта «Татар-информ» да узган матбугат конференциясендә ТР Дәүләт Советы Рәисе урынбасары Юрий Камалтынов хәбәр итте.
«Яшьләр парламенты хәл итә торган бурычлар бик мөһим һәм актуаль. Алар ярдәмендә без кануннарга, шул исәптән бер федераль канунга төзәтмәләр кабул иттек. Яшьләрнең бүген ни белән яшәвен аңлау бик мөһим, ә алардан башка бу хакта беркем дә сөйли алмый. Алар үз утырышларында мөһим мәсьәләләрне республика дәрәҗәсенә күтәрәләр, шуннан соң инде Дәүләт Советы хәл итә. Өстәвенә, бу яхшы мәктәп, анда яшьләр күрергә, анализларга һәм ишетергә генә түгел, ә фикерләрне идеяләргә трансформалаштырырга да өйрәнә», - дип өстәде спикер.
«Бу җәһәттән республикада яшьләр парламентына аналоглар бөтенләй юк. Бу бик җитди вакыйга, анда үз тирәсендәге тормышны яхшыртырга омтылучы битараф булмаган егетләр һәм кызлар эләгергә мөмкин», - дип ассызыклады Камалтынов.
Матбугат конференциясе башлану белән бер үк вакытта сайтта гаризалар кабул итү дә башланды. Кандидат булырга Татарстан Республикасы территориясендә теркәлгән 18 яшьтән 35 яшькә кадәрге гражданнар мөмкин.
«Башта зур булмаган анкета рәвешендә теркәлү узарга кирәк булачак. Аннары сез нинди категория буенча тәкъдим ителергә җыенуыгызны билгеләргә кирәк. Муниципалитетлардан булса, районнан ярдәм хаты кирәк. Иҗтимагый оешмадан бары тик берәр кандидат кына бирелергә мөмкин, алар шулай ук озата баручы хатны тапшырырга тиеш булачак. Үз-үзләрен тәкъдим итүчеләргә бернинди хатлар да кирәкми, алар бары тик үзләренә генә өметләнә, әмма монда бездә һәрвакыт иң зур конкуренция дә бар», - дип аңлатты ТР Дәүләт Советы каршындагы Яшьләр парламенты рәисе Нина Шимина.
Сайтта һәм анкетада теркәлгәннән соң шәхси мәгълүматларны эшкәртүгә гариза һәм ризалык тутырырга һәм сайлау алды программасын ике слайдта эшләргә кирәк. Анда үз идеяләрен тасвирларга кирәк булачак, алар белән кеше Яшьләр парламентына бара һәм якындагы биш ел дәвамында нинди проектларны гамәлгә ашырырга җыена, дип өстәде ул.
Кандидатларга видеоролик яздырырга туры киләчәк, анда бер минут эчендә кандидатның республика яки район тормышын ничек үзгәртүе турында сөйләргә кирәк.
Кандидатлар өчен икенче сынау дебатлар булачак, анда аларга үз сайлау алды программасын тәкъдим итәргә һәм хезмәттәшләренең сорауларына җавап бирергә кирәк булачак. Барлыгы Татарстанның төрле районнарында җиде мәйданчык оештырылачак.
Дебатлар безнең «Синең чират – твоя очередь» форумнары сериясе проекты белән бәйле булачак. Без дебатлар республика яшьләре белән бу очрашуларда узар дип планлаштырабыз. Алар 19 августтан 30 августка кадәр җиде шәһәрдә узачак. Беренчесе Яшел Үзәндә узачак, анда биш район егетләре очрашачак. Кандидатлар үзләрен сайлаучылар алдында тәкъдим итә, барлык сорауларга җавап бирә һәм яшьләр парламентына сайлауларның мәҗбүри этапларының берсен уза алачак», - дип билгеләп үтте ТР Яшьләр эшләре министры урынбасары Айгөл Сабирова.
Форумнар сериясендәге дебатлардан тыш, Татарстан Республикасында булдырылган чаралар һәм мөмкинлекләр турында да сөйләячәкләр. «Бу мәгънәдә Яшьләр парламентының мондый презентациясе дә органик булып күренә. Өстәвенә, бу ел Яшь сайлаучы елы дип игълан ителде», - дип йомгаклады Сабирова.