Татарстанда беренче тапкыр яшь блогерлар форумы узачак
Яшь блогерларның «Мәгънәле» республика форумына гариза бирү кампаниясе старт алды. Бу хакта ТР Яшьләр эшләре министры Ринат Садыйков үзенең ТГ-каналында хәбәр итте.
Катнашу өчен 25 августка кадәр генә гариза бирергә мөмкин. Татарстанда яшәүче 18 яшьтән 35 яшькә кадәрге блогерлар чакырыла. Форум эш башлаучы блогерларга да, булганнарга да кызыклы булачак – программада төрле дәрәҗәдәге белем бирү өлеше каралган. Теркәлү сылтама буенча.
Урын һәм даталар: 3 сентябрьдән 5 сентябрьгә кадәр Лаеш районындагы «Идел» яшьләр үзәгендә.
«Яшьләр булган җирдә булу мөһим. Күп мәгълүматны без бүген социаль челтәрләр аша алабыз. Шул исәптән, яшьләр блогерлар битләрен актив күзәтә. Һәркемгә файдалы мәгълүмат җиткерү өчен без шушы мәйданчыкларда булырга тиеш. Төрле яшьләргә барып җитү өчен безнең өчен блогерлык җәмәгатьчелеге белән аралашуда булу мөһим. Узган елдан башлап без алар белән актив хезмәттәшлек итә башладык. Форумның исеменнән чыгып, без бу эшкә зур мәгънә һәм эчтәлек салабыз», - дип билгеләп үтте ТР Яшьләр эшләре министры Ринат Садыйков.
Аның сүзләренчә, форум тәҗрибә уртаклашу мәйданчыгы булачак. Катнашучылар өчен белем бирү программасы һәм мәдәни чаралар оештырылачак. Спикерлар булып республика һәм федераль блогерлар чыгыш ясаячак.
«Яшьләр арасында блогсфера зур роль уйный, чөнки яшьләр яңа коммуникация чараларын һәм социаль челтәрләрне актив үзләштерә. Блоглар яшьләргә үз-үзләрен белдерү һәм файдалы белем һәм күнекмәләр алу мөмкинлеге бирә. Без яшь блогерлар бергәлеген берләштерү өчен Яшьләр министрлыгы инициативасына зур кызыксыну белән җавап бирдек», - дип билгеләп үтте Казан шәһәренең «Инсайт кешеләр» продюсерлык үзәге Төбәк җитәкчесе Регина Хөсәенова.
Форумны «Инсайт кешеләр»продюсерлык үзәге белән берлектә Татарстан Яшьләр эшләре министрлыгы оештыра.