Яр Чаллыда студотрядлар арасында Бөтенроссия һөнәри осталык конкурсы узачак
26-28 сентябрьдә Яр Чаллыда Татарстан, Чувашия, Башкортостан, Алтай крае, Пермь крае, Пенза, Чиләбе, Архангельск, Саратов, Самара өлкәләреннән, шулай ук Донецк Халык Республикасы һәм Луганск Халык Республикасы студент отрядларыннан 100 катнашучы җитештерү отрядлары арасында «Труд крут» Бөтенроссия һөнәри осталык конкурсына җыелачак.
Җитештерү отрядлары бүгенге көндә студотрядлар хәрәкәте өчен өстенлекле юнәлешләрнең берсе булып тора. 2023 елда ил предприятиеләрендә 5000нән артык студент эшкә урнаштырылган, шуларның 1500дән артыгы – Россиянең 11 төбәгендә оборона-сәнәгать комплексы объектларында. Быел аларның саны ике тапкырга артты, ә тагын Татарстанда һәм Архангельск өлкәсендә мең ярымнан артык баланы берләштергән өч бөтенроссия һәм бер төбәкара хезмәт проекты эшли башлады.
«Сәнәгать предприятиеләренә, шул исәптән оборона-сәнәгать комплексы предприятиеләренә студент отрядларын җәлеп итү кадрлар потенциалын үстерүдә мөһим адым гына түгел, ә инновацияләр һәм җитештерүнең нәтиҗәлелеген арттыру өчен кирәкле импульс тәэмин итә. Татарстан студотрядлары сәнәгатьне кадрлар белән тәэмин итү өстендә 2020 елдан бирле эшлиләр. Икенче ел рәттән республиканың заводларында һәм сәнәгать предприятиеләрендә дүрт меңгә якын кеше эшкә урнаша. Быел без илдә хәрәкәт өчен терәк мәйданчыкка әйләндек», - дип сөйли студентлар хезмәт отрядларының республика үзәге директоры, Россия студентлар отрядларының Күзәтчелек советы әгъзасы Василий Ислаев.
Җитештерү юнәлеше буенча һөнәри осталык конкурсы Россия Студентлар отрядлары тарихында икенче булачак. Узган ел ул беренче тапкыр Казанда Бөтенроссия студотрядлар слеты кысаларында узды. Ул чакта яшьләр өч номинация буенча ярыштылар. Ике номинациядә җиңүчеләр булып Татарстан студентлары Вадим Гыймалов «Электр җиһазларын ремонтлау һәм аларга хезмәт күрсәтү буенча иң яхшы электромонтер» номинациясендә һәм Богдан Лупанов «Электрон - исәпләү һәм исәпләү машиналары операторы» компетенциясендә танылды.
Быел конкурс берьюлы 10 номинация буенча узачак-Яшь профессионаллар исеме өчен көрәшергә электромонтерлар, ЭВМ операторлары, сызым ясаучы-конструкторлар, эретеп ябыштыручылар, токарьлар, фрезерлаучылар, МСР һәм КИП слесарьлары, станок һәм слесарь эшләре контролерлары киләчәк. Өч көн дәвамында яшьләр Чаллы политехника көллиятендә теоретик белемнәрен һәм практик күнекмәләрен күрсәтәчәкләр.
Һәр компетенциядә икенче һәм өченче урыннарны алган конкурс призерларын шимбә көнне үк атаячаклар, җиңүчеләрнең исемнәрен ноябрь ахырына кадәр сер итеп калдырачаклар – алар Мәскәүдә Бөтенроссия студентлар отрядлары слетын ябу тантанасында яңгыраячак.
Проект ТР Яшьләр эшләре министрлыгы ярдәмендә Республика студентлар хезмәт отрядлары үзәге тарафыннан гамәлгә ашырыла.