«Гаилә коды: мөнәсәбәтләр турында» : Татарстанда яшь гаиләләрне үстерүгә юнәлдерелгән проект сессиясе старт алды
ТР Яшьләр эшләре министрлыгы «Россия – мөмкинлекләр иле» платформасы белән берлектә «Волга» яшьләр үзәге базасында яшь гаиләләрдә мәхәббәтне саклауга һәм гармонияле мөнәсәбәтләр урнаштыруга багышланган проект сессиясен башлап җибәрде. Анда Татарстаннан яшь парлар катнаша,аларның берсенә әле 36 яшь тә тулмаган. Проект яшьләр өчен мөмкинлекләр булдыруга юнәлдерелгән һәм «Мәгариф» милли проекты кысаларында уза.
Проект сессиясендә катнашучылар ныклы, бәхетле мөнәсәбәтләр урнаштыру һәм саклау серләрен ача һәм Россиянең һәм Татарстанның әйдәп баручы психологлары белән аралаша алачак. Илһамландыручы спикерлар, гамәли мастер-класслар һәм экспертлар ярдәме катнашучыларга гаилә тормышының нечкәлекләрен аңларга, нәтиҗәле аралашырга һәм конфликтларны хәл итәргә өйрәнергә ярдәм итәчәк. Ә программа гармонияле һәм тату гаилә булдыруга ярдәм итәчәк.
«Без сез – яшь гаиләләр белән танышуыбызга шат, очрашуны бик озак көттек бит! Сайлап алу узганда сез гаилә сәясәтен яхшырту буенча үз идеяләрегезне яздыгыз. Сессиядә сезнең белән бергә без әлеге идеяләр турында фикер алышырга һәм республикада һәм Россиядә гаилә сәясәте үсешенә яңалыклар кертергә телибез. Бу өч көн сезнең өчен илһамландыргыч булыр дип өметләнәбез, һәм сез тагын бер тапкыр үзегезнең бер – берегезгә ничек кадерле булуыгызны аңларсыз. Безнең проект сессияләренең лозунгы, Татарстанның Яшьләр эшләре буенча министрлыгының лозунгы кебек үк - «Ярат. Иҗат ит. Илһамландыр». Өч көн эчендә безнең министрлык башкарган эшләр белән кызыксынуыгызны бик телим. Исегезгә төшерәм, ир белән хатынның һәркайсының яхшы мөнәсәбәте, үзара аңлашуы һәм ярдәмләшүе – бәхетле, тату, имин гаиләнең нигезе. Нәкъ менә шуңа күрә без алмашка бөтен Россиядән психология, педиатрия гинекологиясе һәм репродуктология өлкәсендә иң яхшы белгечләрне чакырдык», - дип сәламләү сүзләре белән тантаналы ачылышны ТР Яшьләр эшләре буенча министрның беренче урынбасары Софья Галиева-Мостафина башлап җибәрде.
Сессия программасы гаиләләр һәм гаилә сәясәте темасына панель дискуссиядән башланды. Чакырылган экспертлар: Татарстан Республикасында Кеше хокуклары буенча вәкаләтле вәкил Сәрия Сабурская, Татарстан Республикасы Иҗтимагый палатасы рәисе Зилә Вәлиева, балигъ булмаганнар эшләре һәм аларның хокукларын яклау буенча республика комиссиясенең җаваплы сәркәтибе Илсөяр Гарифуллина, психолог-педагог, физик, PhD, балаларны нәтиҗәле укытуның 40 тан артык методикасын эшләүче, тиз уку һәм балаларның хәтерен үстерү мәктәпләренә нигез салучы Шамил Әхмәдуллин, Татарстан Республикасы Яшьләр эшләре министрының беренче урынбасары Софья Галиева-Мостафина, Татарстан Республикасы әниләр берлеге директоры Нина Шимина, Татарстан Республикасы «Беренчеләр хәрәкәте» гомумроссия балалар һәм яшьләр иҗтимагый-дәүләт хәрәкәтенең төбәк бүлеге Советы Рәисе урынбасары Ләйсән Засыпкина һәм телевидение алып баручысы, International 2024 Россия миссисы Динара Вургафт.
«Мәхәббәт – иң мөһиме. Һәм бу мәхәббәтне документлар, никах килешүләре белән ныгыту мөһим. Иң мөһиме – гаилә тормышы – ул «язылыштык та бетте» түгел. Барлык хисләреңне гамәлләр белән ныгыту мөһим. Ныклы гаилә шулай гына формалаша ала», – диде дискуссия башында Зилә Вәлиева.
Спикерлар чыгышыннан соң катнашучыларга үз сорауларын бирү мөмкинлеге бирелде. «Гаилә кору, саклап калу, ә иң мөһиме – балаларны планлаштыру турында сөйләгәндә, үз партнерың белән 2 момент турында фикер алышу мөһим. Беренчесе – булачак балаларның дине. Бу бигрәк тә мультимәдәни гаиләләрдә мөһим. Икенчесе – бюджетны гаилә эчендә бүлү. Без беләбез, хәзер төрле ысуллар бар. Бюджет гомуми яки аерым булырмы икәнен билгеләү мөһим; сез нәрсәгә туплыйсыз, ә нәрсәгә тотасыз», – дип җавап бирде Нина Шимина.
Панель дискуссиядә катнашучылар экспертлар белән үзләрен борчыган мәсьәләләр турында фикер алыштылар, гаилә традицияләре һәм мәгънәләре, кыйммәтләре һәм гаилә сәясәтенең киләчәге турында сөйләштеләр. Яшь парлар укуга кызыксыну белдерделәр, ә кунаклар теләкләр әйттеләр һәм үз тәҗрибәләре белән уртаклаштылар. Программа команда туплау белән дәвам итте. Яшь парлар проект сессиясе өчен махсус эшләнгән автор метафорик карталары алдылар. Танышу алар аша үтте: сурәтләнгән иллюстрацияләрдән файдаланып, үзең һәм хис-кичерешләрең турында сөйләргә кирәк иде.
Аннары сессиядә катнашучылар өчен белем бирү программасы башланды. Әлеге программа КФУ доценты, Социаль-фәлсәфи фәннәр һәм массакүләм коммуникацияләр институты директорының административ-хуҗалык эше буенча урынбасары Виктор Сидоровның лекциясе белән башланып китте. Эксперт мәхәббәт турында бу әсәрләрне иҗат иткән төрле картиналар һәм рәссамнар тарихы призмасы аша сөйләде.
Көн гаилә квизы белән тәмамланды. Уенда катнашучылар ял иттеләр, тынычландылар һәм икенче танып белү көненә әзерләнделәр, кәефләрен күтәрделәр. Алдагы ике көндә яшь гаиләләрне бик күп мавыктыргыч мастер-класслар һәм әңгәмәләр көтә.
