Казанда төбәк тарихы буенча дәреслекләр турында фикер алыштылар
Бүген Казанда «Төбәк тарихы буенча дәүләт дәреслекләрен эшләү» Россия хәрби-тарихи җәмгыятенең төбәкара конференциясе эшли башлады.
Чарада Россиянең 30дан артык төбәгеннән тарих буенча төбәк дәреслекләре авторлык коллективлары катнашачак. Алар алдында дәүләт тарихи сәясәте һәм «Россия тарихы» мәктәп курсы юнәлешендә төбәкләр тарихын укыту принциплары һәм алымнары турында фикер алышу тора. Шулай ук төбәк тарихы буенча дәреслекләр проектларын тәкъдим итү һәм фикер алышу булачак.
2023 елның 1 сентябреннән Россиянең югары сыйныф укучылары 10 һәм 11 сыйныфлар өчен тарих буенча бердәм дәүләт дәреслекләре буенча укый башладылар. 5-9 нчы сыйныфлар өчен Россия тарихы һәм гомуми тарих буенча яңа дәреслекләр линейкасы 2024 елның октябрендә сынауны уңышлы узды, ул инде федераль исемлеккә кертелгән. Хәзер фәнни берләшмә алдында тагын бер мөһим бурыч тора – төбәк тарихы буенча дәүләт дәреслекләрен эшләү.
Мәктәп тормышына яңа гына аяк баскан укучының ни өчен бу тарихны өйрәнергә кирәклеген һәм ни өчен аның һәркемгә шәхсән кагылуын аңлавы мөһим. Ул нинди гаиләдә туган, тирә-якта нинди халыклар яши, алар ничек бердәм дәүләт төзегәннәр. Төбәк дәреслекләре бу төшенчәләрне үзләре аша үткәрергә тиеш, - дип билгеләде конференция ачылышында Россия хәрби-тарихи җәмгыятенең фәнни директоры Михаил Мягков.
Төбәк дәреслекләрендә кече Ватанын данлаган эшлеклеләргә игътибар бирелергә тиеш. Шулай ук заманча геройларга – Махсус хәрби операциядә катнашучыларга.
«Моның ниндидер энциклопедик мәкалә булмавы, ә укучыны кызыксындыра алырлык танылган эшлекле турында җанлы хикәя булуы мөһим. Һәм, барыннан да элек, Махсус хәрби операция геройларына игътибар итәргә кирәк. Ниндидер төбәк дәреслекләрендә алар бик лаеклы тәкъдим ителгән, кайдадыр алар гомумән юк. Әлбәттә, дәреслекләрдә Махсус хәрби операция алшартлары һәм сәбәпләре турында әйтелә, ләкин бу аз. Ә бит бу безнең белән янәшә яшәүче һәм без белергә тиешле нәрсәләрне аңлатучы кешеләр», - дип ассызыклады Михаил Мягков.
Ул шулай ук Россия хәрби тарихи җәмгыяте фәнни советы әгъзалары алга таба төбәк дәреслекләрен эшләүдә һәм экспертизалауда актив катнашачаклар, дип сөйләде.
Россия хәрби-тарихи җәмгыятенең агарту эше турындагы доклад белән Россия хәрби-тарихи җәмгыяте башкарма директоры урынбасары Александра Коновченко чыгыш ясады. Ачылу тантанасында шулай ук Татарстан Республикасы Мәгариф һәм фән министры урынбасары Минзәлия Закирова катнашты.
Конференция 15 декабрьгә кадәр дәвам итәчәк. Программада танылган тарихчылар, галимнәр һәм җәмәгать эшлеклеләренең лекцияләре планлаштырылган. Мәгариф блогы спикерлары: Россия хәрби-тарихи җәмгыятенең фәнни директоры Михаил Мягков; «Мин хәтерлим» фонды директоры, Россия хәрби-тарихи җәмгыятенең фәнни советы әгъзасы Артем Драбкин; тарихчы, укытучы, блогер Джон Шемякин; Россиянең яңа тарихы кафедрасы доценты, МПДУның Тарих һәм сәясәт институты директоры урынбасары Николай Глухарев; Россия тарихы кафедрасы доценты, МПДУ Тарих һәм сәясәт институты директорының беренче урынбасары Андрей Клименко; «Укыту эчтәлеге һәм методлары институты» директоры урынбасары, педагогика фәннәре кандидаты Людмила Лагунова; «Тарихи хәтер» фонды директоры, Россия хәрби тарихи җәмгыяте фәнни советы әгъзасы Александр Дюков; ВЦИОМ фонды генераль директоры Константин Абрамов һәм башка экспертлар.
Конференция Россия Федерациясе Мәгариф министрлыгы һәм Татарстан Республикасы Хөкүмәте ярдәмендә Россия хәрби-тарихи җәмгыяте тарафыннан оештырылды.
