Татарстан Республикасының Ел волонтеры 2025 елгы Россия-Кытай уеннары волонтерлары командасының бер өлешенә әверелде
Виктор Воропаев – «Татарстан Республикасының Ел волонтеры – 2024» Гран-при номинациясендә ирекле эшчәнлек өлкәсендә «Игелекле Татарстан» Республика премиясе җиңүчесе волонтер сыйфатында 2025 елгы Россия-Кытай уеннарында катнашу өчен Көньяк Сахалинскка килде.
Зур спорт чарасы 2025 елның 8-14 гыйнварында узачак. Катнашуга Россиянең 17 төбәгеннән 770 волонтер гариза биргән. 200дән артык кандидат сайлап алуны уңышлы узды һәм интенсив әзерлеккә кереште.
Волонтерлык эшчәнлеге «Мәгариф» милли проекты кысаларында гамәлгә ашырыла.
«Бу минем өчен беренче халыкара чара түгел, һәм мин безнең, Татарстан Республикасы волонтерларының, Россия волонтерларының халыкара мөнәсәбәтләрне формалаштыру һәм ирекле эшчәнлекнең яңа юнәлешләрен үстерү мөмкинлеге булуга бик шатмын. Моны Бөтендөнья яшьләр фестивале, БРИКС саммиты, мин катнашкан БРИКС илләре уеннары күрсәтте», - дип уртаклашты Виктор Воропаев.
Урыннарда волонтерлар 10 төрле юнәлештә катнашачак: Россия (чит ил) катнашучылары белән эшләү хезмәте, навигация, медиаүзәк, кайгырту һәм аккредитацияләү, мәдәни программалар, медицина хезмәте күрсәтү, урнаштыру, «Каршы алулар һәм озатулар», спорт объектларында эшләү.
«Ел саен безнең өчен һәр номинациядә җиңүчеләргә зур өлеш керткәннәре өчен рәхмәт белдерү бик мөһим. Быел Татарстан Республикасының Ел волонтеры Көньяк Сахалинскта стажировка узачак һәм Россия-Кытай уеннарында катнашачак. Бу аңа хезмәттәшләребезнең тәҗрибәсен тупларга, тәҗрибәләребез белән уртаклашырга, шулай ук бөек илебезнең матурлыгын күрергә мөмкинлек бирәчәк. Викторга вакытын нәтиҗәле үткәрүен һәм яңа уңышлы елга бик яхшы кәеф белән безнең янга әйләнеп кайтуын телибез!» - дип сөйләде «Татарстан Республикасы ихтыярыйчылык мәгълүмати-ресурс үзәге» башкарма директоры Айрат Мөбәрәкшин.
Белешмә өчен:
2024 елда Виктор Воропаев «Татарстан Республикасының Ел волонтеры-2024» Гран – При номинациясендә иреклеләр (волонтерлык) өлкәсендә «Игелекле Татарстан» республика премиясендә җиңүче булды.
Виктор Донецк Халык Республикасы һәм Луганск Халык Республикасы гуманитар командировкаларында, Казанның 18 шәһәр хастаханәсендәге янгын нәтиҗәләрен бетерүдә, Газа Секторында зыян күргән кешеләр өчен гуманитар йөк төягән самолетны гуманитар җыюда һәм төяүдә, Донецк Халык Республикасы һәм Луганск Халык Республикасыннан күчеп килергә мәҗбүр булган кешеләр очрашуында катнашты. Шулай ук «Тренер» федераль проектының җитәкчесе булып тора.
Быел «Игелекле Татарстан» Республика премиясенә Татарстан республикасының 45 муниципаль берәмлегеннән 373 гариза бирелгән (волонтерлар – 230, командалар – 91, бизнес – 14, гран-при – 38).
14 декабрьдә ирекле эшчәнлек (волонтерлык) өлкәсендә «Игелекле Татарстан» 2024 Республика премиясе тантанасы булды. Анда премиянең һәр номинациясендә 21 җиңүче игълан ителде. Татарстан Республикасы Ел волонтеры – 2024 Көньяк Сахалинскта стажировка узу мөмкинлеге алды.
