Казанда БРИКС һәм ШОСның яшь лидерларын биш юнәлеш буенча бүләкләячәкләр
24-26 гыйнварда Казанда икенче тапкыр БРИКС һәм ШОСның яшь лидерлары премиясе узачак. Финалда Бразилия, Һиндстан, Иран, Казахстан, Кытай, Кыргызстан, Пакистан, Таҗикстан, Эфиопия, Берләшкән Гарәп Әмирлекләре, Үзбәкстан, Көньяк Африка Республикасы һәм Россия вәкилләре катнашачак.
«Премия яңадан бөтен дөнья яшьләренең зур игътибарын җәлеп итте. Без 400дән артык гариза алдык, бу инициативага зур кызыксынуны раслый, ә конкурс бер урынга 40ка якын кеше тәшкил итте. Шунысы куанычлы, гаризалар БРИКС һәм ШОС илләре вәкилләреннән генә түгел, ә башка дәүләт яшьләреннән дә килә, бу берләшүнең әһәмиятен һәм яшь лидерларның үзләрен халыкара хезмәттәшлек кысаларында тормышка ашырырга омтылуларын күрсәтә. Монда Россиянең БРИКСтагы рәислеге һәм бөтен дөнья игътибарын җәлеп иткән Казандагы БРИКС саммиты аерым роль уйнады», - дип билгеләп үтте Яшьләр дипломатиясе академиясе рәисе Дилбәр Садыйкова. Ул билгеләп үткәнчә, бу инициативалар локаль бурычларны хәл итүгә өлеш кертеп кенә калмый, бәлки халыкара дәрәҗәдә йогынты ясау өчен зур потенциалга ия.
Яшьләрнең үз-үзләрен тормышка ашыру өчен мөмкинлекләр тудыру «Яшьләр һәм балалар» милли проекты максатларына туры килә.
Премия биш номинацияне үз эченә ала: «Ел медиа-инфлюенсеры», «Ел социаль эшмәкәре», «Гавами дипломатия буенча ел проекты», «Ел тикшеренүчесе», «Ел экоинициативасы». «Елның яшь социаль эшмәкәре» номинациясендә 2023-2024 елларда БРИКС яки ШОС әгъза-дәүләтләре территориясендә гамәлгә ашырылган 17 тотрыклы үсеш максатларының берсе белән бәйле проектлар авторлары ярыша. «Елның яшь тикшеренүчесе» номинациясендә кандидатлар — тарих, мәгариф, сәнгать, информацион технологияләр, хокук, философия, финанс өлкәсендә фәнни тикшеренүләр авторлары. Ә конкурста катнашучы яшь медиа-инфлюенсерлар арасында — кимендә илле мең аудиторияле социаль җаваплы блогерлар.
Мәсәлән, катнашучыларның берсе – технологик белем бирү өлкәсендә компаниягә нигез салучы, ул 11 500дән артык студентка сыйфатлы белем алырга ярдәм иткән. Аның казанышлары «№1 EdTech Startup Award» һәм «№1 Tech Education Company Award» номинацияләрендә милли премияләр белән билгеләп үтелде. Тагын бер катнашучы — инфлюенсер, үз блогында 700 меңнән артык кеше аудиториясе белән хатын-кызларның мотивациясенә һәм мөмкинлекләрен киңәйтүгә юнәлдерелгән контент тудыра. Ул үзенең язылучыларын илһамландырып, мөһим социаль һәм психологик темаларны яктырта. Катнашучыларның кайбер проектлары экологик агартуга һәм яшьләрне социаль әһәмияткә ия проектларга җәлеп итүгә юнәлдерелгән. Кандидатларның берсе экологик белем бирү өчен платформа булдырган, анда 400дән артык белем бирү видеоматериалы җыелган. Икенче катнашучы 2018 елда Sayaji Startup саммитында «Young Contributors Award» һәм ABP News тарафыннан «Gujarat NGO Leadership Awards» премияләре белән билгеләнгән Һиндстанның иң эре яшьләр волонтерлык оешмаларының берсенә нигез салган. Оешма мәктәпләрдә 10 заманча фәнни лаборатория ачкан, укучыларга заманча белем алу мөмкинлеге биргән.
Халыкара премия ияләре югары белем бирү программалары буенча укучылар өчен «Татарстан Республикасының Ел студенты — 2024» Республика премиясен үткәрү кысаларында игълан ителәчәк. Җиңүчеләр оештыру комитетыннан истәлекле бүләкләр белән бүләкләнәчәк.
Премияне ШОС халык дипломатиясе үзәге, Татарстан Республикасы Яшьләр эшләре министрлыгы, «Татнефть» гавами акционерлык җәмгыяте, Татарстан Республикасы Студентлар Лигасы, шулай ук TV-BRICS Халыкара мәгълүмати партнеры ярдәмендә Яшьләр дипломатиясе академиясе оештыра.
