Кара диңгезне мазуттан чистартуда ярдәм итәргә Татарстаннан 30 волонтер китә
Кара диңгез ярларына Татарстаннан тагын 30 волонтер юл тотачак, алар арасында Бауман исемендәге Казан дәүләт ветеринария медицинасы академиясе студентлары да бар. Алар җирле фауна вәкилләренә ярдәм итәчәк. Бу хакта студентлар көненә багышланган матбугат конференциясендә ТР Яшьләр эшләре буенча министры Ринат Садыйков хәбәр итте.
«Киләсе атнада Татарстан Рәисе Рөстәм Миңнеханов ярдәме белән Татарстаннан 30 волонтер Кара диңгез ярына юл тотачак. Алар арасында хайваннарга һәм кошларга ярдәм итәчәк Ветеринария академиясе студентлары да бар», - дип аңлатты Садыйков.
Исегезгә төшерәбез, декабрьдә Керчь бугазында диңгезгә эләккән, суны һәм ярны пычраткан мазутлы ике танкер һәлакәткә очраган. Татарстанда волонтерлык эшчәнлеге «Яшьләр һәм балалар» милли проекты кысаларында гамәлгә ашырыла.