Казанда Россия көнендә «Кайнар йөрәк» премиясе лауреатларын бүләкләделәр
Казан Кремлендә Татарстан Республикасы буенча баш федераль инспектор Виктор Демидов «Кайнар йөрәк» премиясе лауреатларын – 23 яшькә кадәрге, битараф булмаган һәм актив тормыш позициясе күрсәткән, кешеләргә ярдәмгә риясыз килгән яшьләрне бүләкләде.
«Минем өчен бүген монда булу һәм «Кайнар йөрәк» премиясе лауреатларын бүләкләү зур мәртәбә. Безнең ил Президенты Владимир Путин Россия тарихын бердәмлектә карарга кирәк диде. Ватаныбызның бөеклеген күренекле элгәрләр формалаштырды, без аларга зур хөрмәт белән карыйбыз. Бүген без яшь булуларына карамастан каһарманлык кылган ватандашларыбызга истәлек билгеләре тапшырабыз. Безнең барыбыз өчен дә бу үз Ватаныбызга тугрылыклы хезмәт итүнең якты үрнәге», – дип билгеләде Демидов.
«Кайнар йөрәк» Бөтенроссия иҗтимагый-дәүләт инициативасын уздыруның тугыз елында премияләргә Россиядән һәм чит илләрдән 1,3 меңнән артык лауреат лаек булды.
Демидов Татарстан Республикасыннан дүрт герой: КДЭУ студентлары Рузилә Әхмәдиева, Анастасия Захарова, Рамир Мостафин һәм Бөгелмә төзелеш-техник көллияте студенты Тимур Ваһаповка «кешеләргә карата битараф булмаган мөнәсәбәт, зыян күрүчеләргә ярдәм иткәндә күрсәткән батырлыклары өчен» күкрәк билгеләре тапшырды.
КДЭУ студентлары Рузилә, Анастасия һәм Рамир җәй көне юл күрсәтүчеләргә эшләп, 491 нче «Казан — Адлер» пассажир поездында зыян күрүчеләрне коткарганда ярдәм иткәннәр. Бөгелмә төзелеш-техник көллияте студенты Ваһапов Тимур олы яшьтәге хатынны балкон кәрнизеннән алып коткарды.
«Безнең лауреатлар — Ватан геройларының яшь буынына лаеклы үрнәк. Үз Ватанын чын күңелдән яраткан һәм аны һәрвакыт сакларга әзер булган лаеклы гражданнарны тәрбияләүгә һәм үстерүгә керткән өлешләре өчен ата – аналарга, остазларга һәм педагогларга аерым рәхмәт сүзләрен җиткерәм», — дип өстәде Татарстан Республикасы Яшьләр эшләре министры Ринат Садыйков.
