Кукмара һәм Азнакай районнарында яңа яшьләр объектлары ачылды
Бу атнада Татарстанда ике яшьләр объекты ачылды. Муниципаль районда беренче «Ялкын» яшьләр үзәге Кукмарада барлыкка килде. Биредә коворкинг, музыка студиясе, сәнгать студиясе, киберзал, спорт, тренажер һәм хореография заллары барлыкка килде. Бинаны ремонтлауга республика бюджетыннан 123 миллион сум акча җәлеп ителгән. Азнакай районында яңа «мИКс» яшүсмерләр клубы ачылды. Моңа кадәр 15 ел буена бина буш торган. 2024 елда Азнакай районы яшьләр (яшүсмерләр) клубларын капиталь ремонтлау һәм матди базасын ныгыту республика программасына кертелгән һәм ремонт өчен 57 млн сумга якын акча алган. 664,7 кв. метрда төрле яшьләр мәйданчыклары урнашкан. Биредә коворкинг зона, «Доброцентр», арт-остаханәләр, радио-клуб, «Патриот» клубы, БПЛА өйрәнү өчен пространство һәм башка бик күп нәрсәләр бар. Боларның барысы да сәламәтлек ягыннан мөмкинлекләре чикләнгән яшүсмерләр өчен дә мөмкин булуы мөһим. Яшьләр пространстволарын булдыру «Яшьләр һәм балалар» милли проекты максатларына туры килә.
Ачылышта Татарстан Республикасы Яшьләр эшләре министры Ринат Садыйков һәм муниципалитетлар җитәкчеләре – Кукмара районы башлыгы Сергей Димитриев һәм Азнакай районы башлыгы Марсель Шәйдуллин катнашты.
«Татарстан яшьләр объектларын ремонтлау һәм төзү буенча аерым программа гамәлгә ашырыла торган аз санлы төбәкләрнең берсе. Татарстан Республикасы Рәисе ярдәме белән 204 елда 2,31 млрд сум күләмендә финанслау белән 39 объект төзелде һәм ремонтланды. Агымдагы елда бюджеты 2,45 млрд сум булган 49 объектны яңарту планлаштырыла. Бу республикада безнең яшьләргә, яшәү урынына карамастан, кече ватаннарында яши һәм үсә алсын өчен зур игътибар бирелүен тагын бер кат исбатлый. Бу атнада Чүпрәле районында тагын бер яшьләр үзәге ачуны планлаштырабыз», - дип билгеләп үтте Татарстан Республикасы Яшьләр эшләре министры Ринат Садыйков.
