Казанда брейкинг буенча рекорд куячаклар — 80 кеше бер үк вакытта Җиңүнең 80 еллыгы уңаеннан «эир твист» башкарачак

20 августта Казанда «УРАМ» Яшьләр экстрим-паркында Бөек Ватан сугышында Җиңүнең 80 еллыгы уңаеннан брейкинг буенча рекорд куелачак. Массакүләм флешмобта 6 яшьтән алып 40 яшькә кадәрге 80 тәҗрибәле биюче катнашачак. Катнашучылар бер үк вакытта air twist брейкингы элементын башкарачак. Шунысын да билгеләп үтәргә кирәк, рекорд кую брейкинг һәм урам сәнгате буенча 17 нче Халыкара «Комбонейшн» турниры кысаларында уза, ул Татарстан Республикасы Яшьләр эшләре министрлыгы, Президентның Мәдәни инициативалар фонды һәм  Яшьләр эшләре буенча Федераль агентлык (Россия Яшьләре) ярдәмендә уза.

Рекордта Россиянең 40 тан артык шәһәре вәкилләре катнашачак, алар арасында Мәскәү, Санкт-Петербург, Казан, Әстерхан, Брянск, Бөек Новгород, Вологда, Воронеж, Екатеринбург, Йошкар-Ола, Калуга, Красноярск, Түбән Новгород, Новосибирск, Пермь, Псков, Ростов-на-Дону һәм башкалар.

Проект командасы билгеләп үткәнчә, яшьләрне патриотик тәрбияләү ысулларының берсе – сәнгать аша. Чара шулай ук брейкингны бию стиле һәм спорт буларак үстерергә ярдәм итәчәк, ул яшьләрне сәламәт яшәү рәвешенә, физик активлыкка һәм үз-үзләрен белдерүгә этәрә.

Татарстан Республикасы Рәисе Рөстәм Миңнеханов ярдәме белән республикада яшьләрнең төрле юнәлешләрдә үз-үзен үстерүенә зур игътибар бирелә. Яшьләрнең масштаблы флешмобларда катнашуы шәхес үсеше, сәламәтлеге һәм «Яшьләр һәм балалар» милли проекты максатларына туры килә торган актив гражданлык позициясе формалаштыру өчен шактый файда китерә. Чара 17:00 сәгатьтә башлана.

Исегезгә төшерәбез, элегрәк Казанда брейкинг буенча массакүләм рекордлар куйганнар иде инде. 2019 елда 64 кеше бер үк вакытта «Казан» гаилә үзәге түбәсендә кулларында сикерде, ә 2021 елда 100 кеше бер үк вакытта ТАССРның 100 еллыгы уңаеннан баш өстендә әйләнде.