25-29 сентябрьдә Казанда узачак «Конструктив» Идел буе форумына теркәлү ачык

Куркынычсызлык һәм тәнкыйди фикерләүне үстерү өлкәсендәге төп яшьләр вакыйгасына – яшьләр арасында радикализмны, экстремизмны һәм террорчылык идеологиясен профилактикалау буенча «Конструктив» Идел буе форумына теркәлү башланды. Форум 25-29 сентябрьдә Казанда узачак һәм Идел буе федераль округының 14 төбәгеннән вәкилләрне берләштерәчәк.

Биш көн эчендә 2000нән артык катнашучы мәгълүмати, идеологик һәм психологик куркынычсызлыкның төп темалары турында сөйләячәк, проектлар эшләячәк, тәҗрибә уртаклашачак һәм яшьләр арасында деструктив күренешләрне профилактикалау өчен яңа чишелешләр эзләячәк.

Форумның максаты  —  яшьләрдә һәм белгечләрдә буллингка, экстремизмга, террорчылык идеологиясенә һәм башка куркынычларга каршы тору өчен кирәкле компетенцияләр формалаштыру, шулай ук тәнкыйди фикерләү, стресска чыдамлык һәм медиа-грамоталылык күнекмәләрен үстерү. Бу максатлар «Яшьләр һәм балалар» милли проекты бурычларына туры килә.

2025 елда «Конструктив»та катнашучыларны нәрсә көтә:

1. Конструктив.Познавай белем бирү программасы — лекцияләр, тренинглар, панель дискуссияләр һәм бөтен Россиядән 40 тан артык эксперттан мастер-класслар;
2. Конструктив.Действуй — Идел буе федераль округы төбәкләреннән яшьләр арасында экстремизмны һәм террорчылык идеологиясен профилактикалау эшчәнлеген гамәлгә ашыручы белгечләр өчен белем бирү программасы;
3. Конструктив.Неформат — театр куелышлары, перформанслар, эшлекле уеннар, Казан паркларында, театрларында, музейларында һәм шәһәр киңлекләрендә стримнар һәм викториналар;
4. Росмолодежь.Гранты — проектны гамәлгә ашыруга 1 млн. сумга кадәр алу мөмкинлеге белән «Россия Яшьләре.Грантлар» Бөтенроссия конкурсында катнашу.
5. Челтәрле хезмәттәшлек — иҗтимагый оешмалар лидерлары, хакимият органнары вәкилләре һәм активистлар белән танышу һәм тәҗрибә уртаклашу.

Тематик юнәлешләр:

1. Цифрлы куркынычсызлык — интернетта үзеңне ничек сакларга, фейкларны танырга һәм цифрлы гигиенаны сакларга.
2. Психологик һәм идеологик куркынычсызлык — гаиләдә, коллективта һәм мәгариф учреждениеләрендә сәламәт атмосфераны ничек формалаштырырга.
3. Буллинг, экстремизм, террорчылык идеологиясен профилактикалау —  уңышлы практикаларга, проектларга һәм деструктив бергәлекләргә каршы тору коралларына күзәтү.

«Конструктив» нәтиҗәләре буенча Идел буе федераль округы төбәкләре өчен иң яхшы практикалы гайд чыгару планлаштырыла, ә форумда катнашучылар квалификация күтәрү турында таныклык яки курслар узу турында сертификат ала алачак.

Форумда катнашырга Идел буе федераль округы төбәкләренең 18 яшьтән өлкәнрәк яшьләр, яшьләр сәясәте, мәгариф һәм мәдәният өлкәләрендә эшләүче белгечләр, шулай ук иҗтимагый оешмалар вәкилләре, хакимият органнары һәм террорчылыкка каршы комиссияләр хезмәткәрләре чакырыла.

«Конструктив» Татарстан Республикасы Яшьләр эшләре министрлыгы һәм Татарстан Республикасында Террорчылыкка каршы комиссия аппараты тарафыннан Татарстан Республикасы Иҗади яшьләр академиясе белән берлектә Россия Федерациясе Президентының Идел буе федераль округындагы Тулы вәкаләтле вәкиле аппараты, Яшьләр эшләре буенча Федераль агентлык һәм «Татнефть» Хәйрия фонды ярдәмендә гамәлгә ашырыла.

Теркәлү 2025 елның 20 сентябренә кадәр түбәндәге сайтта ачык: https://atmrt.ru/konstructiv