Татарстанда эзләү отрядларының республика фестиваленә йомгак ясалды
«Чайка» балалар сәламәтләндерү лагеренда эзләү отрядларының XXIV Республика фестивале уңышлы узды. Ватанны саклаганда һәлак булганнарның истәлеген мәңгеләштерү эшендә тәҗрибә уртаклашу һәм квалификация күтәрү мәйданчыгына әверелгән чарага Татарстан Республикасының 10 эзләү берләшмәсеннән 150 катнашучы җыелды.
Өч көн дәвамында мәктәп укучылары һәм студентлардан торган командалар үзләренең белемнәрен һәм гамәли күнекмәләрен камилләштерделәр. Фестиваль программасына эзләнүчеләрне һөнәри, интеллектуаль, иҗади, спорт һәм туристик әзерләүне үз эченә алган 10 конкурс юнәлеше кертелгән иде. Катнашучылар архив-эзләү эшчәнлегендә, атуда, Бөек Ватан сугышы тарихын белүдә, кармавыч эзләүдә һәм башка махсуслаштырылган эзләү дисциплиналарында ярыштылар. Яшьләргә патриотик тәрбия бирү «Яшьләр һәм балалар» милли проекты максатларына туры килә.
Фестивальдә дәрәҗәле кунаклар: Татарстан Яшьләр парламенты рәисе, Татарстан Республикасы Дәүләт Советы депутаты Нина Шимина һәм Татарстан Республикасы Яшьләр эшләре министры Ринат Садыйков булды. Делегация чараның программасы белән танышты, конкурс сынауларын күзәтте һәм катнашучылар белән аралашты, эзләнү отрядлары эшенең югары әһәмияткә ия булуын ассызыклады.
Фестивальгә йомгак һәм аның рәсми ябылышы 7 сентябрьдә булды. Барлык конкурс юнәлешләрендә җиңүчеләр дипломнар һәм кыйммәтле бүләкләргә лаек булдылар, Татарстан яшь эзләнүчеләренең югары әзерлек һәм фидакарьлек дәрәҗәсен расладылар.
«Фестивальне шундый якты һәм истә калырлык итеп оештырганнары өчен һәр катнашучыга чын күңелдән рәхмәт белдерәсем килә. Өч көн дә югары дәрәҗәдә узды, кояшлы һава торышы аеруча күңелле булды. Шунысын да билгеләп үтәсем килә, киләсе ел безнең өчен юбилейлы булачак – без инде XXV фестивальне үткәрәчәкбез. Һәм без аны тагын да масштаблырак һәм кызыклырак итү өчен бөтен көчебезне куячакбыз. Шуңа күрә мин сезне үз тәэсирләрегез һәм тәкъдимнәрегез белән уртаклашырга чакырам, без бергәләп чын мәгънәсендә күренекле вакыйга булдыра алабыз»,-дип мөрәҗәгать итте катнашучыларга Татарстан Республикасының «Ватан» Берләшмәсе» яшьләр оешмасы советы рәисе Александр Коноплев.
Оештыручы - «Хәтер вахтасы-2025» проекты кысаларында Татарстан Республикасы Яшьләр эшләре министрлыгы ярдәмендә Татарстан Республикасының «Ватан» Берләшмәсе» төбәк иҗтимагый яшьләр оешмасы: «Россия хәрби-тарихи җәмгыяте» Гомумроссия иҗтимагый-дәүләт оешмасының Татарстан Республикасындагы төбәк бүлеге финанс ярдәме белән 2024 елгы граждан җәмгыятен үстерүгә Татарстан Республикасы гранты акчаларыннан файдаланып гамәлгә ашырыла торган Татарстан Республикасы эзләү отрядлары эшчәнлегенә оештыру, мәгълүмати-методик ярдәм күрсәтүне тәэмин итү.
