2026 елда Татарстанда иярчен лагерьларда 1 меңгә артыграк кеше ял итәчәк
Татарстанда быел алты иярчен лагерь эшләде, аларда 1,1 меңнән артык бала ял итте. Проектны киләсе елда да үстерү дәвам итәчәк, 2026 елда сәламәтләндерү кампаниясе башлануга тагын сигез шундый объект эшләтеп җибәрергә планлаштыралар, бу 1 меңгә артыграк кеше ял итәчәк дигән сүз. Бу хакта Татарстан Республикасы Министрлар кабинетында узган брифингта Татарстан Республикасы Яшьләр эшләре министры Азат Кадыйров хәбәр итте.
«2025 елда Татарстан Республикасы Рәисе Рөстәм Миңнеханов тарафыннан сигез муниципаль берәмлектә: Бөгелмә, Биектау, Чүпрәле, Кукмара, Лаеш, Мөслим, Минзәлә, Түбән Кама районнарында сигез иярчен лагерь төзүгә 46,7 млн сум акча бүлеп бирелгән. Җәйге сәламәтләндерү кампаниясе тәмамланганнан соң барлык лагерьларда палаткалы лагерьларны монтажлау башланды. 2026 елның җәйге сәламәтләндерү кампаниясенә монтаж төгәлләнәчәк, бу ял итүчеләрне 1 мең кешегә арттырырга мөмкинлек бирәчәк», - дип сөйләде ул.
Исегезгә төшерәбез, узган ел иярчен лагерьларны үстерүгә 50,9 млн сум акча бүлеп бирелгән иде. Татарстан Республикасы Рәисе Рөстәм Миңнеханов карары нигезендә республика бюджетыннан 43,9 млн сум һәм «Яшьләр һәм балалар» милли проектының «Яшьләргә ярдәм итү системасын үстерү» федераль проектының «Яшьләр өчен төбәк» федераль программасы кысаларында 7 млн сум акча тотыла. Сменасына 260 кешене колачлый торган алты иярчен лагерь төзелде.