Татарстан алыкларының Яшьләр Ассамблеясе халык иҗаты һәм декоратив-гамәли сәнгать конкурсына гаризалар кабул итә башлады
Татарстан халыкларының Яшьләр Ассамблеясе Татарстан Республикасы Яшьләр эшләре министрлыгы ярдәмендә Республика яшьләр фестивален – халык иҗаты һәм декоратив-гамәли сәнгать конкурсын уздыра. Приз фонды – 100 000 сум.
Фестиваль якты, үзенчәлекле һәм талантлы катнашучыларга ярдәм итәргә, аларның иҗади сәләтләрен ачу һәм алга таба һөнәри үсеш өчен уңай шартлар тудырырга, шулай ук һөнәри багланышларны үстерүгә һәм халыкның киң даирәләренең игътибарын осталар һәм һөнәрчеләр иҗатына җәлеп итүгә ярдәм итәргә тиеш. Яшьләр үсеше өчен мөмкинлекләр тудыру «Яшьләр һәм балалар» милли проекты максатларына туры килә.
Конкурста 14 яшьтән 35 яшькә кадәрге яшь осталар һәм рәссамнар катнаша ала. Моның өчен гаризаны 2025 елның 25 октябренә кадәр https://clck.ru/3PaBYR сылтамасы буенча тутырырга, шулай ук ВКонтактеда автор үзе турында хикәя һәм #ТрадицииВНовыхФормах2025 хэштегы белән авторлык эшләренең фотосурәтләрен пост итеп бастырырга кирәк.
Эшләр өч юнәлеш буенча кабул ителә:
- халык иҗаты хәзинәләре (халыкның традицион сәнгать кәсепләрен, һөнәрләрен һәм мәдәни мирасын саклау һәм популярлаштыру);
- заманча интерпретацияләр (халык сәнгать җитештерүенә инновацион якын килүләргә басым ясалырга тиеш);
- мәдәниятләр гармониясе (юнәлеш төрле этник традицияләрне һәм стильләрне берләштерә, катнашучыларга төрле мәдәниятләрнең уникаль мотивларын һәм бизәкләрен өйрәнергә һәм тәкъдим итәргә мөмкинлек бирә).
Йомгак ясау һәм җиңүчеләрне бүләкләү 5 ноябрьдә Татарстан Халыклары Дуслыгы йортында узачак.
