Татарстан катнашучысы «Минем медиа сайлауларым» Бөтенроссия конкурсы номинациясендә җиңүче булды
Вологдада «Минем медиа сайлауларым» Өченче Бөтенроссия конкурсының финалы узды. «Яңа мәгълүмати технологияләр өчен» номинациясендә Татарстаннан Светлана Еремова җиңүче булды. Вологда өлкәсе Хөкүмәте бинасында аңа Россия Федерациясе Үзәк сайлау комиссиясе әгъзасы Антон Лопатин һәм Донецк Халык Республикасының Сайлау комиссиясе рәисе Владимир Высоцкий конкурсның махсус призын һәм Россия фонды Ирекле сайлаулар дипломын тапшырдылар.
Татарстан Үзәк сайлау комиссиясенең Казандагы Кремль яр буендагы «Сайлау ноктасы» мәгълүмат үзәгенә багышланган видеоролигы конкурс комиссиясенең югары бәясенә лаек булды. 14 сентябрьгә билгеләнгән сайлаулар алдыннан Светлана Еремова аның эшен оештыручыларның берсе булды.
«Минем медиа сайлауларым» – яшь кешеләргә бөтенроссия ярышына кушылу, үзләренең иң яхшы иҗади сәләтләрен күрсәтү өчен менә дигән мәйданчык. Безнең өчен бу мөһим җиңү! Россия Үзәк сайлау комиссиясенә, Россия ирекле сайлаулар фондына, Вологда өлкәсе сайлау комиссиясенә конкурсны югары дәрәҗәдә оештырган өчен рәхмәт белдерәм», - дип билгеләп үтте Татарстан Үзәк сайлау комиссиясе рәисе Андрей Кондратьев.
2024 елда Россия дәүләт гадел хөкем университетының Казан филиалының дүртенче курс студенты Светлана Еремова «Атмосфера» Яшьләр кадрлар проектында җиңүче булды. Ул Татарстан Яшьләр эшләре министрлыгы һәм Татарстан Республикасы Үзәк сайлау комиссиясе белән берлектә гамәлгә ашырыла. 2025 елда Светлана Еремова Татарстан Үзәк сайлау комиссиясенең «Сайлау ноктасы» мәгълүмат үзәге җитәкчесе булды.
Исегезгә төшерәбез, 2025 елгы бердәм тавыш бирү көне алдыннан Кремль яр буендагы «Сайлау ноктасы»нда журналистлар өчен 11 брифинг узды, сайлау кампаниясенең һәр этабының үзенчәлекләре, сайлаучылар өчен цифрлы сервис мөмкинлекләре турында фикер алыштылар, мөмкинлекләре чикләнгән гражданнарның сайлау хокукларын үтәү, экстерриториаль сайлау участоклары эше, «ИнформУИК» проекты кысаларында республика Үзәк сайлау комиссиясенең яшьләр белән үзара хезмәттәшлеге мәсьәләләре күтәрелде.
