Казан халкы һәм кунаклары Россия Студентлар язын тамаша кыла алачак

25-29 ноябрьдә Казан бөтен ил югары уку йортлары өчен «Россия Студентлар язы» XXXIII Бөтенроссия фестивалендә катнашучылар өчен үз ишекләрен ачачак. Шәһәр халкы һәм кунаклары фестиваль кысаларындагы юнәлешләр буенча 26 һәм 27 ноябрьдә узачак конкурс сынауларының тамашачылары була алачак. Яшьләрнең иҗади үзбилгеләнүе өчен мөмкинлекләр тудыру «Яшьләр һәм балалар» милли проекты максатларына туры килә. ​

2025 елда фестивальнең гамәлгә куючылары һәм оештыручылары булып Россия Федерациясе Фән һәм югары белем министрлыгы, «Россия Яшьләр берлеге» гомумроссия иҗтимагый оешмасы һәм Татарстан Республикасы Яшьләр эшләре министрлыгы белән Татарстан Республикасы Хөкүмәте тора. Фестиваль Россия Федерациясе Мәдәният министрлыгы һәм Яшьләр эшләре буенча федераль агентлык (Россия Яшьләре) ярдәмендә оештырыла. Генераль партнер булып Ак Барс банк тора.

Төбәк вәкилләре өчен конкурс сынаулары 7 шәһәр мәйданчыгында узачак: һәр юнәлеш өчен үз локациясе билгеләнгән. Фестиваль мәйданчыклары, катнашучылар чыгыш ясаган вакытка карап, конкурсның ике көнендә дә теркәлүдә күрсәтелгән вакытта тамашачыларны каршы алырга әзер булачак.

Тамашачыларга һәр юнәлешкә сылтамалар буенча алдан теркәлү узарга кирәк булачак: Төбәк программа – Химиклар мәдәният йорты, теркәлү  һәм Тимер юлчылар мәдәният йорты, теркәлү; «Вокаль»,  теркәлү; «Инструменталь», теркәлү; «Оригиналь жанр», теркәлү; «Театраль», теркәлү; «Мода», теркәлү; «Диджеинг», теркәлү; «Бию», теркәлү. Һәр юнәлеш буенча тамашачылар өчен урыннар саны чикләнгән, 12+яшь чикләве гамәлдә. Алдан теркәлмәгән тамашачылар мәйданга кертелмәячәк.

«Быел фестиваль Бөек Җиңүнең 80 еллыгына һәм Ватанны саклаучылар елына багышланган. Тамашачыларны бөтен илебездән диярлек катнашучылар әзерләгән ихлас һәм чын-чынлап рухи номерлар һәм программалар көтә. Татарстан башкаласында яшәүчеләрне һәм кунакларны аларга терәк булырга һәм Студентлар язы мәйданчыкларына алдан теркәлү узарга чакырабыз», - дип ассызыклады Татарстан Республикасы Яшьләр эшләре министры Азат Кадыйров.

Чара узган көнне фестиваль мәйданчыгында куркынычсызлыкны тәэмин итү максатыннан керү урынында шәхси тикшерү пункты оештырылачак, шуңа бәйле рәвештә тамашачыларга мәйданчыкка алдан килергә киңәш ителә. Фестиваль мәйданчыкларында навигация тамашачыларга һәм катнашучыларга уңайлы булсын өчен волонтерлар көче белән оештырылачак.

«Фестивальнең барлык мәйданчыклары да катнашучыларны кабул итүгә тулысынча әзер. 250 кешедән торган волонтерлар корпусы булдырылды, алар навигациядән алып туклануны оештыруга һәм концерт мәйданчыкларында эшләүгә кадәр барлык төп юнәлешләр буенча эшләячәк. Без бу көннәрнең иҗади ярышлар белән генә түгел, җылы кунакчыллык атмосферасы белән дә истә калуын телибез», – дип ассызыклый фестивальнең төбәк дирекциясе Башкарма директоры Валентин Шихобалов.

Исегезгә төшерәбез, фестиваль Россиядә Ватанны саклаучылар елына багышланачак һәм Бөек Ватан сугышында Җиңүнең 80 еллыгы кысаларында «Җиңү язы» шигаре астында узачак. 2025 елда фестивальнең гамәлгә куючылары һәм оештыручылары: Россия Федерациясе Фән һәм югары белем министрлыгы, Татарстан Республикасы Хөкүмәте, Татарстан Республикасы Яшьләр эшләре министрлыгы һәм «Россия яшьләр берлеге» гомумроссия иҗтимагый оешмасы. Фестиваль Яшьләр эшләре буенча Федераль агентлык (Россия Яшьләре) ярдәме белән узачак.

Фестивальнең барлык трансляцияләре һәм көндәлек видеороликлары VK Видеода һәм Россия яшьләр берлегенең «Студвесна» (Россия Студентлар язы) программасы бергәлегендә ВКонтакте  — фестивальнең рәсми социаль челтәрендә урнаштырылачак.

Шунысын да билгеләп үтәргә кирәк, «Россия Студентлар язы» Бөтенроссия фестивале – Россиядә иң масштаблы студентлар иҗат фестивале, ул 1993 елдан бирле ел саен үткәрелә һәм «Студвесна» (Россия Студентлар язы) яшьләр иҗатына ярдәм итү һәм аны үстерү программасының флагман проекты булып тора.