Татарстанның 19 югары уку йорты «Обучение служением» программасын гамәлгә кертә
Экспертлар «Татар-информ»да узган матбугат конференциясендә Татарстанда «Обучение служением» федераль программасын үстерү планнарын тәкъдим иттеләр. Республиканың инде 19 югары уку йорты әлеге проектта катнаша, реаль социаль проектларны уку процессына интеграцияли.
Программа студентларга һәм мәктәп укучыларына остазлар җитәкчелегендә коммерцияле булмаган оешмалардан, дәүләт яки бизнес-структуралардан биремнәр үтәргә мөмкинлек бирә. Әлеге проектлар уку процессының бер өлеше булып тора: курс эше, практика яки хәтта диплом проекты.
«Гражданны кечкенәдән үк тулы хокуклы катнашучы буларак социаль практикага керергә мөмкинлек бирмичә тәрбияләргә ярамый», – дип ышаныч белдерде Татарстан Республикасы Яшьләр эшләре министры урынбасары Владислав Усанов.
Ул ассызыклаганча, программа Россия Президенты Владимир Путин йөкләмәсен үтәүгә эшли һәм «кулланучылар җәмгыятен» тәрбияләүгә ярдәм итә торган трендларга каршы тору коралы булып тора.
«Укытучы җитәкчелегендә студентлар коммерцияле булмаган оешмалар, бюджет учреждениеләре яки бизнес очраша торган реаль проблемаларны хәл итә. IT-белгечләр начар күрүчеләр өчен җайлаштырылган сайтлар булдыра, ә табиблар саңгырау пациентлар белән аралашу өчен ишарәләр телен өйрәнә», – дип мисал китерде икътисад фәннәре докторы, ТР Иҗтимагый палатасы мәйданчыгында «Обучение служением» кураторы Варвара Кулькова.
19 югары уку йортыннан тыш, программада 65 партнер оешма катнаша. Проектны системалы үстерү өчен бердәм стандарт эшләнде. Аның турында Татарстан Республикасы Ихтыярыйлык мәгълүмати-ресурс үзәге башкарма директоры Айрат Мөбәрәкшин сөйләде.
«Стандарт – ул көллиятләр һәм югары уку йортлары өчен адымлы инструкция, ул кураторларны билгеләүне, студентлар командаларын булдыруны, «Игелеек.Үзәкләрен» ачуны һәм программаның үзен укыту планнарына гамәлгә кертүне үз эченә ала. Без шулай ук югары уку йортларына ихтыярыйлыкка, ирекле берләшмәләргә ярдәм итүнең эчке чараларын эшләргә тәкъдим итәчәкбез», – дип ассызыклады Мөбәрәкшин.
Киләсе адым – урта һөнәри белем бирү программасын киңәйтү һәм күбрәк партнерлар җәлеп итү, бигрәк тә бизнестан. 2026 елның төп вакыйгасы «Обучение служением. Татарстан» дип аталган конференциядә 100 студент һәм коммерцияле булмаган оешма вәкилләрен иң яхшы практикалар белән алмашу өчен җыячаклар.
«Аларның йөрәкләре йомшара, һәм алар гражданнарга әверелә. Алар кешеләргә яхшылык эшләп, үзләренең һөнәри компетенцияләрен тормышка ашыра алуларын аңлыйлар», – дип йомгаклады Кулькова.