Ике көн эчендә Татарстан делегациясе катнашучылары Россия Студентлар язында 10 юнәлештә 31 номер күрсәтәләр

2025 елның 27 ноябре, пәнҗешәмбе

Татарстанда икенче көн Россия студентлар язының конкурс программасы уза. Фестивальдә Татарстан Республикасы делегациясендә 10 уку йортыннан: Казан Федераль университеты, Казан дәүләт энергетика университеты, Казан милли тикшеренү технология университеты, А. Н. Туполев исемендәге Казан милли тикшеренү техник университеты, Казан дәүләт архитектура-төзелеш университеты, Социаль белем бирү академиясе, Казан дәүләт медицина университеты, Казан дәүләт мәдәният институты, В. Г. Тимирясов исемендәге Казан Инновация университеты, Казан дәүләт аграр университетытыннан 75 кеше катнаша.

Делегация җитәкчесе Дилия Гасыймова билгеләп үткәнчә, ике көн эчендә Татарстан студентлары фестивальдә барлык 10 юнәлештә 31 номер тәкъдим итә: «Төбәк программа», «Вокал», «Инструменталь», «Бию», «Театраль», «Оригиналь жанр», «Мода», «Медиа», «Видео», «Арт».

Театр юнәлешендә Татарстаннан 5 номер, вокал юнәлешендә – 4 номер, бию юнәлешендә – 3 номер, инструменталь юнәлештә – 4 номер, «Оригиналь жанр» да – 3 номер, шулай ук «Мода» юнәлешендә 3 коллекция тәкъдим ителгән. «Медиа» юнәлешендә республикадан 4 катнашучы көч сынаша, видеода – 3 катнашучы, «Арт» юнәлешендә – 1 катнашучы. Кичен делегация төбәк программасын тәкъдим итәчәк, анда республиканың 27 студенты катнашачак.

Фестивальнең конкурс программасы кысаларында Татарстан Республикасы тамашачыларны этник мәдәният дөньясына чума торган үзенчәлекле сәнгать перформансы тәкъдим итте. Катнашучылар шигъри күренеш тудырдылар, анда төп персонаж булып тамашачыны татар милли традицияләре аша үткәрүче ай тора.

Спектакльнең үзенчәлеге сәхнә костюмнарында этник мотивларны заманча укылышы булды. Иҗат итүчеләр билгеләп үткәнчә, алар милли эстетиканың сәнгати, әкияти гәүдәләнешен сайлап, традицион орнаментларны турыдан-туры кулланудан аңлы рәвештә читкә киткәннәр. Перформансның төп бурычы —  заманча театр сәнгате теле аша бөтен Россиядән килгән тамашачылар өчен татар мәдәнияте байлыгын ачу.

Татарстаннан башка бер катнашучы да үз тәэсирләре белән уртаклашты: «Без «О как?» номеры белән чыгыш ясадык, әлеге номер  — әнисенең йөкләмәсен кем үтәргә тиешлеген хәл итә алмаган ике бала турындагы тарих. Без бу номерны Татарстан Республикасы гала-концертында күрсәткән идек инде, көчле дулкынлану булмады — материал йөз процентка өйрәнелгән иде. Ләкин сәхнәгә чыккач, тәндә калтырау йөгерде. Чыгыштан соң шуны аңладык: без соңгы 8 ай дәвамында әлеге номерга салган бөтен хезмәтебезне күрсәттек», — дип сөйләде Айнур Тимергалиев.

Хәзер үк Татарстан делегациясе төп вакыйгага — төбәк программасын күрсәтүгә әзерләнә, анда бөтен республикадан иң яхшы номерлар һәм иҗади табышлар берләшәчәк.

«Безнең төбәк программасы Советлар Союзы Герое, бөек ватандашыбыз Муса Җәлил турында. Бөек Ватан сугышы вакытында ул әсирлеккә төшә һәм, яшерен эшчәнлек алып барып, тоткыннарны эчтән көрәшергә өнди, күтәрелешләр оештыра. Сюжетта үзәк урынны аның үлемсез әсәрләрен — сугыштан соң могҗиза белән Советлар Союзына эләккән «Моабит дәфтәрләрен» иҗат итү тарихы алып тора. Нәкъ менә алар аның героизмының һәм үлгәннән соң тернәкләнүенең төп дәлилләре, чөнки моңа кадәр ул озак вакыт хыянәтче булып саналган», - дип уртаклашты төбәк программасы делегациясе режиссеры Руслан Фехрединов.

Фестивальнең барлык трансляцияләре һәм көндәлек видеороликлары VK Видеода һәм Россия яшьләр берлегенең «Студвесна» (Россия Студентлар язы) программасы бергәлегендә ВКонтакте ​— фестивальнең рәсми социаль челтәрендә урнаштырылачак.

Шунысын да билгеләп үтәргә кирәк, «Россия Студентлар язы» Бөтенроссия фестивале – Россиядә иң масштаблы студентлар иҗат фестивале, ул 1993 елдан бирле ел саен үткәрелә һәм «Студвесна» (Россия Студентлар язы) яшьләр иҗатына ярдәм итү һәм аны үстерү программасының флагман проекты булып тора.

2025 елда фестивальнең гамәлгә куючылары һәм оештыручылары булып Россия Федерациясе Фән һәм югары белем министрлыгы, «Россия Яшьләр Берлеге» гомумроссия иҗтимагый оешмасы һәм Татарстан Республикасы Яшьләр эшләре министрлыгы белән Татарстан Республикасы Хөкүмәте тора. Фестиваль Россия Федерациясе Мәдәният министрлыгы һәм Яшьләр эшләре буенча Федераль агентлык (Россия Яшьләре) ярдәмендә оештырыла. Генераль партнер булып Ак Барс Банк тора.