Республика әйдаманнар мәктәбенә кабул итү ачылды
Татарстан Республикасы Яшьләр эшләре министрлыгы матбугат хезмәте хәбәр иткәнчә, Татарстанда бердәм республика әйдаманнар мәктәбенә кабул итү ачылды. Быелгы укыту кампаниясенең үзенчәлеге шунда ки, алдагы елларда балалар ялын һәр төбәк оештыручысы җәйге сәламәтләндерү кампаниясе өчен әйдаманнарны мөстәкыйль әзерләгән, ә бу юлы чара берьюлы берничә шундый оештыручыны берләштергән.
Гариза бирү кампаниясе 28 февральгә кадәр дәвам итәчәк. Укыту программасы РФ Мәгариф министрлыгы (2024) тәкъдимнәре нигезендә эшләнгән һәм Татарстан Республикасының балаларны савыктыру лагерьлары өчен квалификацияле әйдаманнар әзерләүне күздә тота. Укулар февральдән майга кадәр барачак һәм үз эченә көндезге лекцияләр, интенсивлар, төрле мастер-классларны ала. Йомгаклар буенча дәүләт үрнәгендәге таныклык бирү һәм әйдаман һөнәрен алу белән аттестация узачак. Мәктәп практикасында әйдаманнар арасында студентлар гына түгел, ә үзләрен бу һөнәрдә «сынап карарга» омтылган эшләүче кешеләр дә булган.
«Республика әйдаманнар мәктәбе Татарстан Республикасы Яшьләр эшләре министрлыгының актив ярдәме белән старт ала һәм «Яшьләр һәм балалар» милли проекты максатларына туры килә. Мондый мәктәпне эшләтеп җибәрү – чараларны оештыручы яшьләрнең һөнәри мохитен формалаштыруда мөһим адым. Бу булачак әйдаманнар кирәкле компетенцияләр алачак, нәтиҗәле командалар төзергә һәм буш вакытны оештыруга иҗади якын килергә өйрәнәчәк аерым пространство. Укуны 17 яшьтән башлап теләгән һәркем уза ала. Быел укуларда 500 кеше катнашыр дип уйлыйбыз», - дип билгеләп үтте Яшьләр эшләре министры Азат Кадыйров.
Республика әйдаманнар мәктәбен оештыручылар булып «Җәй» балалар һәм яшүсмерләрнең сәламәтләндерүен, ялын һәм мәшгульлеген оештыру буенча республика үзәге һәм Татарстан Республикасының «Беренчеләр Хәрәкәте» гомумроссия иҗтимагый-дәүләт балалар хәрәкәтенең төбәк бүлеге тора. Оештыруда катнашучылар – «Сәләт-Ак Барс» Яшьләр үзәге, «Костер» Республика яшьләр үзәге, Черноморец һәм Байтик лагерьлары. Мондый чараларны үткәрү «Яшьләр һәм балалар» милли проекты максатларына туры килә.