Казанда Татарстан Республикасының яшь галимнәрен бүләкләү тантанасы узды
"Созвездие-Йолдызлык" Арт - резиденциясендә берьюлы берничә конкурс һәм яшьләр фәненә ярдәм итү программалары җиңүчеләрен бүләкләү тантанасы узды. Чара бөтен республиканың иң яхшы студентларын, аспирантларын һәм яшь галимнәрен берләштерде, Татарстанның илнең алдынгы фәнни-мәгариф төбәкләренең берсе буларак югары статусын раслады.
Татарстан Республикасы Яшьләр эшләре министры урынбасары Владислав Усанов: "Без Татарстан халкының бердәм, көчле халык булуын күрсәтәбез, ул үз тарихын хәтерли һәм бер үк вакытта мирасын да үстерә. Бу Татарстан яшьләре, безнең республика һәм Россия өчен барысы да яхшы булачагына ышаныч бирә. Мондый инициативаларны хуплаган һәм яшьләргә алга барырга ярдәм иткән һәркемгә рәхмәт".
Тантана "Татарстан Республикасының иң яхшы яшь галиме - 2025" конкурсында җиңүчеләргә, Татарстан Республикасы Махсус дәүләт стипендиясе лауреатларына, яшь галимнәр өчен республика премияләре алучыларга, шулай ук Татарстан Республикасы Фәннәр академиясе стипендиатларына бүләкләр тапшыруны үз эченә алды. 160 тан артык җиңүче лаеклы бүләкләр алды.
Чара Татарстан Республикасы Яшьләр эшләре министрлыгы һәм Татарстан Республикасы Фәннәр академиясе ярдәмендә узды. Аның бурычлары республикада фән һәм технологияләр унъеллыгын уздыру планына, шулай ук "Яшьләр һәм балалар" милли проекты максатларына туры килә.
Быел "Татарстан Республикасының иң яхшы яшь галиме" конкурсы бөтен республикадан яшь галимнәрдән 190нан артык гариза җыйды, бу проектны уздыруның унбиш еллык тарихында рекордлы күрсәткеч булды.
Шунысын да билгеләп үтәргә кирәк, яшьләр фәненә ярдәм итү программасы темпын үстерүне дәвам итә: узган ел республика Рәисе яшь галимнәр өчен Гран-при булдыру идеясен хуплады. I дәрәҗә Гран-при иясе 500 мең сум күләмендә бүләк алачак, II дәрәҗә Гран-при – 350 мең сум, ә III дәрәҗә Гран-при – 250 мең сум.