Татарстанда балалар лагере базасында илдә беренче «СО.Здание» мультиформат киңлек ачылды
Россия Студентлар отрядлары көнен бәйрәм итү кысаларында Татарстанда «Кама Артегы» үзәгендә «СО.Здание» Студентлар отрядларының мультиформат киңлеген ачу тантанасы булды. Проект коворкинг, күргәзмә-мәгълүмати комплекс һәм яшьләр өчен һөнәри юнәлеш бирү үзәге функцияләрен берләштерә торган бердәм яшьләр мәйданчыгыннан гыйбарәт.
«Системалы рәвештә һөнәри формалашу һәм хезмәткә хөрмәт тәрбияләү мәктәп эскәмиясеннән үк, иртә һөнәри юнәлеш механизмнары аша башланырга тиеш. Бүген без яшьләр арасында җәйге чорда рәсми рәвештә хезмәт итү мөмкинлеге гаять зур булуын күрәбез: 2025 елда Татарстанда яшүсмерләрнең хезмәт отрядлары составында 3858 балигъ булмаган граждан үзләренең беренче һөнәри тәҗрибәсен алды. Бу хәзерге буынның мөстәкыйльлеккә омтылуын һәм үз иленә файдалы булырга теләвен раслый», – дип билгеләп үтте Татарстан Республикасы Яшьләр эшләре министры Азат Кадыйров.
«Кама Артегы» базасында мәйданчык булдыру төбәкнең яшьләр сәясәтен үстерү өчен стратегик әһәмияткә ия, чөнки объект турыдан-туры балаларны савыктыру учреждениесе базасында эшләүче студент отрядларының илдәге беренче мультиформатлы пространствосы булачак. Проект үсеп килүче буынның өзлексез һөнәри үсеше концепциясен гамәлгә ашыру өчен яңа мөмкинлекләр ача.
«Россия студентлар отрядлары хәрәкәтнең төбәк бүлекчәләре инфраструктурасын үстерү буенча актив эш алып баралар. Үз киңлекләреңә ия булу чараларны үз мәйданчыгыңда уздырырга, күбрәк студентларны һәм мәктәп укучыларын җәлеп итәргә, шулай ук төбәк штабны эшне оештыру урыны белән тәэмин итәргә мөмкинлек бирә.
«Кама Артегы» базасында студентлар отрядлары пространствосын ачу Татарстан студентлар отрядларына яшүсмерләрнең хезмәт отрядлары юнәлешен үстерү буенча эшне көчәйтергә мөмкинлек бирәчәк. Бу киңлек илдә 35 нче булды», — дип шәрехләде Россия студентлар отрядларының Үзәк штабы җитәкчесе (командиры) Ярослав Зубащенко.
Үзәктә сәламәтләнүче балалар интерактив экспозицияләр аша Россия студентлар отрядлары хәрәкәте тарихына һәм традицияләренә чумып кына калмыйча, иртә профориентация дә уза алачак. Махсус җиһазландырылган уен зонасында яшүсмерләр актуаль белгечлекләр белән уңайлы формада танышачаклар, бу хезмәт эшчәнлегенә тотрыклы кызыксыну уятырга һәм киләчәктә республика һәм ил икътисады өчен сыйфатлы кадрлар резервы әзерләргә мөмкинлек бирәчәк.
«Профориентация чылбырында безнең педагогик юнәлеш мөһим роль уйный. Узган ел балалар лагерьларында Татарстанның 1 067 студенты эшләгән, алар 9,5 меңнән артык бала өчен сыйфатлы һәм имин ял итүне тәэмин иткән. Инде хәзер үк без лагерь мохитенә тематик «РСО көннәре» форматын актив гамәлгә кертәбез. Бу сменалар кысаларында балалар интерактив квестларда катнаша, студент отрядларының төп белгечлекләре турында видеороликлар төшерә һәм, иң мөһиме, яшүсмерләр өчен кирәкле һөнәрләр һәм вакансияләр турында үз шәһәрләрендә актуаль мәгълүмат ала. «СО.Здание»да балалар виртуаль чынбарлык форматында һөнәрне үзләренә, гади һәм аңлаешлы уен формасында сынап карый алачак. Бу безгә белем бирү, уен һәм хезмәт практикаларын берләштерергә, балалар ялын киләчәк тормыш юлын аңлы рәвештә сайлауның мөһим этабына әверелдерергә мөмкинлек бирәчәк», – дип сөйләде Республика студентлар отрядлары үзәге директоры, Россия студентлар отрядларының Күзәтү советы рәисе урынбасары Василий Ислаев.
Проектны гамәлгә ашыру РСО фондының финанс ярдәме нәтиҗәсендә мөмкин булды. Пространствоны булдыруга ел саен уздырыла торган «Удар хезмәт көне» Бөтенроссия акциясе кысаларында Татарстан студотрядлары җыйган акчалар юнәлдерелгән. Шулай итеп, объект республиканың актив яшьләренең киләчәк буыннар өчен инфраструктура үсешенә шәхси өлеш кертүе нәтиҗәсе булып тора.
Студент отрядларының эшчәнлеге «Яшьләр һәм балалар» милли проекты максатларына туры килә, яшь гражданнарның үз-үзләрен тормышка ашыру һәм нәтиҗәле эшкә урнашу өчен шартлар тудыруга ярдәм итә.
