Руслан Семенов: «Сәләт – ул сыйфат билгесе!» – бүген «Сәләтле җәй-2026» сәламәтләндерү кампаниясенә һәм XI еллык «Сәмрух» премиясенә багышланган матбугат конференциясе узды
Бүген «Сәләтле җәй-2026» җәйге кампаниясе башлануга һәм сәләтле балаларга һәм талантлы яшьләргә ярдәм итү өлкәсендә ел саен үткәрелә торган «Сәмрух» ХІ республика премиясен тапшыру тантанасына багышланган матбугат конференциясе узды.
Чарада Татарстан Республикасы Рәисе ярдәмчесе, «Беренчеләр Хәрәкәте» Россия балалар һәм яшьләр хәрәкәтенең Республика бүлеге җитәкчесе Тимур Сөләйманов, Татарстан Республикасы Яшьләр эшләре министры урынбасары Руслан Семенов, «Сәләт» яшьләр үзәге директоры Айгөл Габдрахманова, Татарстанның топ-блогеры, «Копилка счастья» хәйрия проекты авторы, Татарстан Яшьләр эшләре министрлыгы каршындагы Иҗтимагый совет әгъзасы, Сәләтче Алинә Гыймалетдинова, «Сәләт» яшьләр үзәге директоры урынбасары, «Сәләтле җәй» үзәге җитәкчесе Аяз Хәнәфин һәм «Ел әйдаманы» номинациясендә XI еллык «Сәмрух» премиясе җиңүчесе Раил Харисов катнашты.
«Сәләт» Татарстан төбәк яшьләр фонды Татарстан Республикасы Хөкүмәте ярдәмендә 2015 елдан башлап актив балаларны, яшьләрне, остазларны, аланнарны, Сәләт клубларын ел саен «Сәмрух» премиясе белән бүләкли. 26 февральдә 18: 00 сәгатьтә Бәшир Рәмиев исемендәге ИТ-паркта «Сәләт» җәмгыятенең иң актив сәләтле балаларын һәм талантлы яшьләрен бүләкләү максатында ХІ еллык «Сәмрух» республика премиясе тапшырылачак. Сәләт активистлары өчен бу чара еллык эш нәтиҗәләрен күрсәтү чарасы буларак та мөһим чараларның берсе булып тора.
Быел премия 17 номинация буенча бирелә: «Ел сәлкеше», «Ел әйдаманы», «Ел юлдашлары», «Елның өлкән әйдаманы», «Ел методисты», «Ел директоры», «Ел клубы», «Ел укытучысы», «Ел партнеры», «Сәләт җырлый», «Стипендия Сәләт», «Без рәхмәтле», «Бер дулкында», «Класс Сәләт», «Ел клубы кураторы», «Без Сәләтне яктыртабыз». Шулай ук 9 махсус номинациядә җиңүчеләр бүләкләнәчәк.
«Һәрбер сәләтче ел саен үткәрелә торган «Сәмрух» премиясен түземсезлек белән көтә, бу чыннан да гаять зур проект. Ул ел дәвамында Сәләтне үстерүчеләргә һәм ныгытучыларга рәхмәт белдерү, аларның казанышларын тану, иң сәләтлеләрен бүләкләү максатларында үткәрелә. 11 ел эчендә чарада 825тән артык кеше катнашты, 100дән артык җиңүче билгеләнде», - дип билгеләп үтте «Сәләт» яшьләр үзәге җитәкчесе Айгөл Габдрахманова.
Матбугат конференциясендә Сәләт гариза бирү кампаниясенең башлану датасы игълан ителде. Ел дәвамында Сәләт үзенең проектлары ярдәмендә 18 000нән артык балага татар теле белән кызыксыну уята, аларны татар мәдәнияте белән таныштыра. 2026 елда 50 профильле смена үткәрелер дип көтелә, шуларның 28е җәйге каникул чорында узачак.
«Сәләт – ул зур бер дөнья. Сәләт проектларының кульминацион ноктасы – әлбәттә «Сәләтле җәй»! Җәмгыятьнең чын атмосферасын күрәсең, тоясың килсә, җәй көне Сәләт шәһәренә кил. Балаларыгызга бу мөмкинлекләрне бүләк итегез. Биредә алар бөтенләй яңа мохиткә эләгәләр, аралашырга, фикер йөртергә, үз фикердәшләрен табарга өйрәнәләр, яхшы гадәтләргә ия булалар, спорт-мәдәни чараларда катнашалар, үз сәләтләрен үстерәләр. Яшьләр Сәләт һәм «Беренчеләр Хәрәкәте»нә кушылсын, катнашсын, камилләшсен», - дип ассызыклады Татарстан Республикасы Рәисе ярдәмчесе, «Беренчеләр Хәрәкәте» Россия балалар һәм яшьләр хәрәкәтенең Республика бүлеге җитәкчесе Тимур Сөләйманов.
Татарстан Республикасы Хөкүмәте, Татарстан Республикасы Яшьләр эшләре министрлыгы һәм Татарстан Республикасы Мәгариф һәм фән министрлыгы ярдәмендә агымдагы елда 25 җәйге профиль сменасы үткәрү планлаштырыла. География Татарстан Республикасы, Чуваш Республикасы һәм Кырым Республикасы базаларын үз эченә ала. Чаралар программасына шулай ук Биләр тарих-археология музей-тыюлыгы территориясендә «Сәләт» XV Халыкара яшьләр мәгариф форумын һәм «Болгар-Туган тел» төбәкара сменасын үткәрү керә.
Яшьләр проекты Татарстан Республикасы Рәисе Рөстәм Миңнеханов ярдәме белән Татарстан Республикасы районнарыннан 14 000 сәләтле баланы, остазларны, Россиянең башка төбәкләреннән һәм чит илләрдән килгән ватандашларны берләштерәчәк.
«Сәләт» яшьләр хәрәкәте бүгенге көндә Татарстан Республикасы балаларына һәм яшьләренә генә түгел, ә Россия Федерациясенең башка субъектларына да үз-үзләрен таныту өчен киң мөмкинлекләр тәэмин итә торган алга киткән система булып тора. Исегезгә төшерәм, мондый проектларга ярдәм итү «Яшьләр һәм балалар» милли проекты максатларына туры килә. Әлеге структураның төп звеносы булып «Сәләтле җәй» үзәге тора, аның эшчәнлеге сәләтле балаларның җәйге сыйфатлы сәламәтләндерү ялын оештыруга юнәлдерелгән. Сәләт – бренд, сыйфат билгесе», - дип сөйләде Татарстан Республикасы Яшьләр эшләре министры урынбасары Руслан Семенов.
«Сәләтле җәй» җәйге кампаниясенә әзерлекле кадрлар җәлеп ителәчәк. Сәләт бу эшне ел әйләнәсе алып бара. Кадрлар әзерләү максатында «Әйдаманнар мәктәбе» әйдаманлык осталыгы мәктәбе, «Башҗитәкләр мәктәбе» җитәкчеләр һәм «Укытучылар мәктәбе» үткәрелә, аларның эшчәнлегендә 700 дән артык кеше катнаша.
«Сәләт аланында, проектларда катнашырга теләүче щйдаманнар өчен махсус онлайн һәм офлайн дәресләр оештырылды, «Башҗитәкләр мәктәбе» һәм «Медиа мәктәбе» проектлары үз эшләрен дәвам итте. Сменалар өчен сыйфатлы программа әзерләү көздән үк башлана. «Сәләтле җәй - 2026» гариза кампаниясе 1 мартта яңа Сәләт платформасында эшли башлый. Яңа платформа аңлаешлы, заманча, стильле, аның үз рейтинг һәм платформа системасы балаларны сайлап алу чарасы гына түгел, ә Сәләткә тартуның тагын бер ысулы да булып тора», - дип ассызыклады «Сәләтле җәй» үзәге җитәкчесе Аяз Хәнәфин.
Аның сүзләренә караганда, һәр баланың үзенә ошаган профиль сменасын сайлап алу һәм бу юнәлешне тирәнтен өйрәнү мөмкинлеге бар.
Татарстанның топ-блогеры, «Копилка счастья» хәйрия проекты авторы, Татарстанның Яшьләр эшләре министрлыгы каршындагы Иҗтимагый совет әгъзасы, Сәләт сменасында катнашучы Алинә Гыймалетдинова Сәләтнең тормышындагы роле турында сөйләде.
«Үз вакытында мин дә Сәләт проектларында актив катнаштым, ә хәзер бирегә спикер, остаз, эксперт, әни буларак киләм, ел саен форумнарда катнашам, балаларымны Сәләт җәйге профильле сменаларга җибәрәм. Бу еллар эчендә Сәләт масштаблары киңәйде, Сәләт елдан-ел үсә, яңа мөмкинлекләр ача, талантлы яшьләрне үстерә», - диде ул үз чыгышында.
«Ел әйдаманы» номинациясендә XI «Сәмрух» премиясе җиңүчесе Раил Харисов та очрашуда үз тәэсирләре белән уртаклашты:
«Минем сәләтем булуга мин бик шат. Ел дәвамында мин үз эшчәнлегемне актив алып баручы «Яшь йөрәкләр» театр лабораториясенең режиссеры ролендә катнашам. Мин иҗат кешесе, Сәләт миңа иҗат дөньясында үз урынымны табарга ярдәм итте, мине үстерде, камилләшергә, хыялларымны тормышка ашырырга мөмкинлек бирде. Чыннан да, Сәләт – ул мөмкинлекләр мохите. Мин аңа бик рәхмәтле!»