Казанда «Җиңү поезды» уникаль күчмә күргәзмәсе ачылды
Казан-1 тимер юл вокзалында дөньяда беренче булып «Җиңү поезды» иммерсив күчмә күргәзмәсен ачу тантанасы булды. Чара яшьләр оешмалары активистларын, хакимият вәкилләрен һәм республика җәмәгать эшлеклеләрен берләштерде.
Беренче юл перронында экспозиция эшенә рәсми старт бирелде. Ачылу тантанасында Татарстан Республикасы Яшьләр эшләре министры Азат Кадыйров, «ЮНАРМИЯ» хәрәкәтенең төбәк бүлекчәсе штабы башлыгы генерал-майор Александр Бородин, шулай ук махсус кунак — язмышы яшь буын өчен батырлык һәм кыюлык үрнәге булган Россия Герое Иван Жарскийның әнисе Илмира Жарская катнашты.
«Җиңү поезды» Татарстанга килде. Проект безнең яшьләр өчен тәрбия характерында. Ул Казанда өч көн – 10 мартка кадәр булачак. Аннары, 11-14 мартта, ул Яр Чаллыда торачак. Безнең республиканың поезд хәрәкәте графигына кертелүе очраклы түгел. Татарстан Бөек Ватан сугышында Җиңүгә үз халкының хәрби хәрәкәтләрдә катнашуы белән дә, фронтны барлык кирәк – яраклар белән тәэмин итү күзлегеннән дә зур өлеш кертте», - дип билгеләп үтте Азат Кадыйров.
Һәр вагон Бөек Ватан сугышының үзенчәлекле тарихын күрсәтә. Килүчеләр сугыш алдыннан да, Кызыл Армия солдатлары белән окопта да, бронепоездда да, хәтта концлагерьда да булырга мөмкин. Күргәзмәнең соңгы ике өлеше Нюрнберг, Токио һәм Хабаровск процессларына һәм Бөек Җиңүгә багышланган.
Чарада катнашучылар өчен бай программа оештырылды: Казан танк училищесы көче белән җәелдерелгән кыр кухнясы эшләде, анда теләгән һәркем кайнар чәй һәм солдат боткасы белән җылына алды. Моннан тыш, вокзал яны мәйданында интерактив мәйданчыклар эшләде. Татарстанның «Игелекле Татарстан» мәгълүмати-ресурс үзәге белгечләре кунаклар өчен мастер-класслар үткәрделәр. Шулай ук Кораллы Көчләр сафларында контракт буенча хезмәт мәсьәләсе буенча консультациянең мобиль пункты җәелдерелде, анда теләгән һәркем ведомство вәкилләреннән мәгълүмат ала алды.
Исегезгә төшерәбез, «Җиңү поезды» — хәрәкәт итә торган составта урнаштырылган дөньяда беренче иммерсив инсталляция. Күргәзмә билгеләнгән график нигезендә, барлык куркынычсызлык чараларын үтәп, Казан халкы һәм кунаклары өчен ачык булачак. Патриотизм тәрбияләү «Яшьләр һәм балалар» милли проекты максатларына туры килә.
