«Ел казанышы-2020»: гаризалар бирү кампаниясе ябылуга бер атна калды
Профессиональ белем бирү оешмаларында белем алучылар өчен «Ел казанышы-2020» V Республика премиясенә гаризалар кабул итү дәвам итә. Гаризаларны сайтта 30 сентябрьгә кадәр бирергә мөмкин.
2016 елдан башлап, ел саен эшчәнлекнең төрле өлкәләрендәге казанышлары булган йөзләгән студент «Ел казанышы» премияләренә берләшә, үсеш өчен гомуми киңлек булдыра.
Бәйгедә катнашу өчен Татарстан Республикасы һөнәри белем бирү оешмаларының көндезге уку бүлегендәге Урта һөнәри белем бирү программалары буенча 15-25 яшьлек укучылар чакырыла. Бәйгедә индивидуаль рәвештә дә, коллективлар составында да катнашырга мөмкин.
Быел түбәндәге номинацияләр билгеләнде: «Ел старостасы», «Ел интеллекты», «Елның иҗади шәхесе», «Ел спортчысы», «Ел медиа остасы», «Ел иреклесе», «Ел җәмәгатьчесе», «Ел профессионалы» һәм Гран – при - «Татарстан Республикасы ел казанышы-2020».
Коллективлар өчен: «Елның студентлар үзидарәсе органы», «Елның студентлар фәнни оешмасы», «Елның студентлар иҗат коллективы», «Елның студентлар медиасы», «Елның студентлар проекты», «ФОРПОСТ «студентлар отряды», «Елның студентлар советы тулай торагы» һәм «Елның иреклеләр берләшмәсе».
2021 елда премия дүрт этапта үткәрелә: 1 этап – 30 сентябрьгә кадәр гаризаларны электрон тапшыру, 2 этап – 1 октябрьдән 8 октябрьгә кадәр читтән торып кабул итү (эксперт советы тарафыннан гаризаларны карау һәм бәяләү), 3 этап – 11-25 октябрьдә (конкурс сынауларында катнашучылар узу) һәм 4 этап – 2021 елның 27 октябрендә җиңүчеләрне бүләкләү тантанасы узачак.
Премия оештыручылары: Татарстан Республикасы Яшьләр эшләре министрлыгы, Татарстан Республикасы мәгариф министрлыгы һәм Спорт учреждениеләре директорлары советы ярдәмендә «Татарстан Республикасы Студентлар лигасы» төбәк яшьләр иҗтимагый оешмасы.