«Наше Время – Безнен заман» хәрәкәте Республика көненә зур концерт бирәчәк
Казан һәм Татарстан көнендә 30 августта Камал театры каршындагы мәйданда «Наше Время – Безнен заман» хәрәкәте концерты була. Бу хакта «Татар-информ»да узган матбугат конференциясендә ТР Яшьләр эшләре министры Ринат Садыйков хәбәр итте.
«Наше Время – Безнен заман» фестивале-республикабызның бренд проектларының берсе. Ул республикабыз предприятиеләрендә һәм оешмаларында эшләүче бик күп иҗади яшьләрне берләштерә. Аны гамәлгә ашыру елларында анда 11 меңнән артык кеше катнашты. Традиция буенча, шәһәр һәм Республика көнендә зур концерт үткәрәчәкбез, анда төбәк халкын һәм кунакларны котлыячакбыз. 12 предприятиедән 200дән артык катнашучы гариза биргән», - дип өстәде ул.
Фестиваль яшьләрнең иҗади үсешенә генә түгел, эш урынындагы нәтиҗәлелеккә дә ярдәм итә, дип ышана ТР сәнәгать һәм сәүдә министрының беренче урынбасары Родион Карпов.
«Теләсә кайсы резюмеда хобби пункты бар. Анда «Наше время - Безнен заман»да катнашу яки теләсә нинди иҗади юнәлеш күрсәтелсә, кеше яхшырак эшли башлый. Һәр җитәкче фестиваль турында белә һәм хезмәткәрләрне активрак катнашулары өчен бүләкли», - дип ассызыклады Карпов.
Хәзер XII «Наше время - Безнен заман» фестиваленең гариза кампаниясе бара. Ул 15 сентябрьгә кадәр дәвам итәчәк, дип сөйләде Россия Федерациясе Хөкүмәтенең мәдәният өлкәсендәге премиясе лауреаты, Россия Театр эшлеклеләре берлеге әгъзасы, мәдәният буенча ТР Иҗтимагый палатасы әгъзасы, Татарстан Республикасының һәм Кырым Республикасының атказанган сәнгать эшлеклесе, «Наше Время - Безнен заман» фестиваленең мактаулы остазы, генераль продюсеры Дмитрий Туманов.
Фестиваль эшче яшьләрнең иҗади үсешенә ярдәм итеп кенә калмый, ә республиканың төрле предприятиеләре хезмәткәрләре арасында дустанә мөнәсәбәтләр дә булдыра, дип ассызыклады Мамадыш районының «Мәгариф бүлеге» МКУ командасы капитаны Эльмира Әхмәтова.
«Конкурста без бер - беребезгә көндәшләр, әмма калган вакытта без-зур иҗади гаилә. Без төрле районнардан килгән предприятиеләр хезмәткәрләре белән тыгыз аралашабыз. Тамашачылар өчен фестиваль бер ай дәвам итсә, катнашучылар өчен - ел буе. Без әзерләнәбез, репетицияләр ясыйбыз. Эш көненнән соң һәрвакыт җыенуы кыен, әмма әзерлек вакытында барлык проблемалар онытыла», - дип аңлатты ул.
«Наше время - Безнен заман» фестивале «Мәгариф» милли проектының талантлы яшьләргә ярдәм итү һәм үстерү максатларына туры килә.