Татарстан делегациясе «Халыклар дуслыгы» фестивалендә Байконур шәһәре башлыгы белән очрашты
Татарстан делегациясе Казахстанда «Халыклар дуслыгы» фестивалендә Байконур шәһәре башлыгы Константин Бусыгин белән очрашты. Алар яшьләр сәясәте өлкәсендә алдагы хезмәттәшлек һәм Байконур вәкилләренең җавап визиты турында фикер алыштылар, дип хәбәр итте ТР Яшьләр эшләре министры урынбасары Айгөл Сабирова.
«Без үзара мөнәсәбәтләрне алга таба үстерү, яшьләр сәясәтенең иң яхшы практикаларын өйрәнү өчен Байконур делегациясенең безгә килүе турында фикер алыштык, шулай ук безнең республика делегациясенең ел саен «Халыклар дуслыгы» форумында катнашачагы турында килештек. Мондый сәфәр яшьләр оешмалары активистларын бүләкләү булачак», - дип аңлатты Сабирова.
«Халыклар дуслыгы» фестивале һәрвакыт көзен җирле космодромнан ракета җибәрер алдыннан үткәрелә. Быел Татарстан егетләре Россиянең «Союз – МС-26» пилотлы корабы җибәрелүен күрә алдылар.
Татарстан делегациясенең Казахстанга сәфәре быел март аенда Сочи шәһәрендә узган Бөтендөнья яшьләр фестиваленең мирасы булып тора. Бөтендөнья фестивалендә Татарстан Казахстан Республикасы яшьләре делегациясенә мәдәни шефлык күрсәтте. Сәфәр Татарстан Республикасы Рәисе Рөстәм Миңнеханов ярдәме белән Байконур шәһәре администрациясе чакыруы буенча оештырылды.
Татарстан Республикасы Яшьләр эшләре министрлыгы тарафыннан фестивальдә катнашу өчен Татарстан Республикасында дәүләт яшьләр сәясәтен гамәлгә ашыру кысаларында үзен аеруча ачык күрсәткән 15 активисттан торган делегация составы эшләнде. Алар арасында волонтерлар, Яшьләр дипломатиясе академиясе, иҗади яшьләр академиясе активистлары, Татарстан башкаласының балалар һәм яшьләр эшләре комитетының яшь хезмәткәрләре, узган Бөтендөнья яшьләр фестивале делегатлары бар.