«Республика» КВН Лигасы финалына чыгу өчен Татарстан һәм Марий Элдан 9 команда көрәшәчәк
Уенны КВН югары лигасы катнашучысы Рома Головин алып барачак.
6 октябрьдә 18: 30 сәгатьтә «Чулпан» мәдәни үзәгендә «Республика» КВН Лигасының ярымфиналы узачак. Финалга чыгу өчен Татарстан Республикасы районнары һәм шәһәрләреннән, шулай ук Марий Эл Республикасыннан 9 команда көрәшәчәк.
Билгеләп үтик, ярымфинал этабы – сезонның кызган чагы. Ярымфиналга сайлап алу этабы май аенда узган фестиваль булды, аннары 1/4 өлеше узды. Исегезгә төшерәбез, ¼ финалдан соң ярымфиналга 8 команда чыкты. Ә тагын бер команда финалдан соң студентлар «Шәһәр лигасы»на өстәлде. Кагыйдәләр буенча, студентлар лигасы чемпионы автомат рәвештә «Республика» КВН рәсми лигасының ярымфиналына эләгә.
«Республика» лигасының ярымфиналында 9 команда катнаша: КДЭУ, Халыкара сервис көллияте, КНИТУ-КХТИ командалары, шулай ук Казан, Яр Чаллы, Татарстан Республикасы Актаныш авылы һәм Марий Эл Республикасы командалары.
Командалар уенын ТР КВН директоры Рамил Агдеев, «Волга-Волга» төркеме солисты Антон Салакаев, «Площадь свободы» PR-агентлыгына нигез салучы Алсу Сәетова, «МАИ» КВН командасы составында КВН югары лигасы катнашучысы Евгений Городницкий бәяләячәк.
«Республика» Лигасы уенының үзенчәлеге шунда ки, һәр уенда – төрле алып баручы. 6 октябрьдә уенны «Кызыл төлке» командасы составында КВН югары лигасы катнашучысы Рома Головин алып барачак.
«Республика» лигасы җиңүчесе финалга узачак, анда катнашучы командаларга Сочи шәһәрендә КВН Халыкара фестивалендә катнашу өчен юллама оту мөмкинлеге биреләчәк. Финал уены декабрьдә узачак.
Исегезгә төшерәбез, узган 2023-2024 елгы сезонда «Республика» лигасы җиңүчесе булып Яр Чаллыдан «Ингеборга Дапкунайте» командасы танылган иде. Моннан тыш, бу команда Мәскәү шәһәрендә Халыкара КВН берлеге Премьер-лигасы финалына үтте.
Быел «ТР КВН» төбәк иҗтимагый оешмасы оешманың 30 еллыгын билгеләп үтә. Бу уңайдан «Чемпионнар Кубогы» юбилей уены 7 ноябрьдә «УНИКС»та узачак.
