Татарстан студентлар отрядлары 2024 елда 550 млн сумнан артык акча эшләгән
Якынча исәпләүләр буенча, быел Татарстанның хезмәт отрядлары студентлары 550 млн сумнан артык акча эшләгән. Бу хакта «Татар-информ»да узган матбугат конференциясендә ТР Яшьләр эшләре буенча министрның беренче урынбасары Софья Галиева-Мостафина сөйләде.
«2024 елда Татарстанда хезмәт семестрын 12 меңнән артык студент эшләде, 15 меңгә җитү планлаштырыла, шуның 3,5 меңнән артыгы оборона-сәнәгать комплексы предприятиеләрендә эшләде. Россия Студентлар Отрядлары Татарстан бюджетына барлык яшьләр юридик оешмалары арасында иң күп акча кертә», - дип өстәде ул.
Агымдагы елда республика бюджетына студотрядлар тарафыннан салымнар ярдәмендә генә дә 60 млн сумнан артык акча җәлеп ителгән. Балалар ил эчендәге объектларга гына түгел, башка дәүләтләргә дә эшләргә йөриләр, дип сөйләде Татарстан студентлар хезмәт отрядларының республика үзәге директоры Василий Ислаев.
«Без Татарстанның 54 оешмасы белән хезмәттәшлек итәбез. Халыкара объектларга килгәндә, 86 студент илебездән читкә: Белоруссиягә, Төркиягә, Бангладешка һәм Мисырга китте. Шул ук вакытта Татарстанга җитештерүгә эшкә килгән егетләр саны 20% ка арткан», - дип аңлатты ул.
Белоруссия территориясендә Татарстан егетләре патриотик үзәк төзелешендә катнашты, дип билгеләп үтте «Тесла» КДЭУ студентлар отрядлары штабы комиссары Айгөл Миңнекаева.
«Быел без тулай торак төзү һәм төзекләндерү белән шөгыльләндек. Проект җәй көне генә эшләми. Үзәк балаларга патриотик тәрбия бирү мөмкинлеге бирәчәк. Анда Белоруссиядән дә, Россиядән дә егетләр килә. Бездә Татарстаннан алты төзелеш отряды эшләде», - дип сөйләде ул.
Татарстан студентлар хезмәт отрядларының республика үзәге ТР Яшьләр министрлыгы карамагындагы оешма булып тора. Яшьләрнең үз-үзләрен тормышка ашыру өчен мөмкинлекләр тудыру «Мәгариф» милли проекты максатларына туры килә.
.jpg)