Татарстаннан Милли премиясе финалисты күчмә «Тернәкләндерү үзәге»н ачты, ул 150 инвалид кешегә ярдәм итәчәк
Марат Ильясов – Татарстан Республикасыннан инженер-конструктор, «Россия – мөкинлекләр иле» милли премиясе финалисты. Милли премиянең бурычлары «Мәгариф» милли проекты максатларына туры килә. Паралич суккан килеш, Марат үзенең тернәкләндерү аппаратларын уйлап тапкан, алар хәзер инвалидлар һәм мөмкинлекләре чикләнгән кешеләр арасында зур популярлык казанган. Хәзер ул «Тәгәрмәчләрдә тернәкләндерү үзәге» булдырды, бу терәк-хәрәкәт аппараты бозылган кешеләр өчен аның авторлык тренажерлары урнаштырылган мобиль тернәкләндерү комплексы. Үзәкне тәкъдим итүдә Татарстан Республикасы Сәламәтлек саклау министры Марсель Миңнуллин катнашты. Марат шулай ук үзенең уйлап табуын Татарстан Республикасы Башлыгы Рөстәм Миңнехановка тәкъдим итәчәк.
Марат Ильясовның авторлык тренажерлары ярдәмендә Татарстан Республикасының Апас, Баулы, Бөгелмә, Бун, Югары Ослан, Биектау, Чүпрәле, Кайбыч, Яшел Үзән, Кама Тамагы, Питрәч, Тәтеш һәм Ютазы районнарында инвалидларны тернәкләндерү оештырылачак. Тренажерлар медицина эшләнмәләре сыйфатында теркәлгән, Татарстанның җиде тернәкләндерү үзәгендә, шулай ук Мәскәүдә Н.И. Пирогов исемендәге Милли медицина-хирургия үзәгендә апробация узган һәм үзләрен уңышлы күрсәткән.
Мобиль комплекс шулай ук Казан шәһәренең «7 номерлы шәһәр клиник хастаханәсе» мобиль поликлиникасы белән берлектә эшләячәк. Ул билгеле бер вакыт аралыгына, 1 атнадан 2 айга кадәр, 11 ай дәвамында, 2024 елның декабрь башыннан 2025 елның октябрь ахырына кадәр, поликлиникалары һәм стационарлары булмаган һәм мохтаҗ кешеләрнең тернәкләнү мөмкинлеге булмаган районнарның торак пунктларына барачак.
Мобиль поликлиникада пациентларны алдан тикшергәннән соң, белгечләр аларны дәвалау процедуралары өчен мобиль комплекска җибәрәчәк. Билгеләнгән төркем өчен дәресләрне мобиль комплекста тренажерларда дәвалау физкультурасы буенча инструктор үткәрәчәк. Теләсә кайсы мохтаҗ кеше мобиль комплекска барып, тренажерларда шөгыльләнә алачак. Билгеләнгән төркем өчен шулай ук өйдә үз-үзеңне күнегүләр ясау өчен укыту, шул исәптән онлайн-консультацияләр оештырылачак. Моннан тыш, билгеләнгән төркемнең «МИН БУЛДЫРАМ» үзәгендә Ильясов тренажерларында тернәкләндерү курсын уңышлы узган пациентлар белән очрашуы планлаштырыла.
«Минем проект кысаларында барлыгы 150 инвалидны колачлау планлаштырыла. Шулай итеп, тулы канлы тернәкләндерү курсын узгач, инвалидлар үзләренең хәрәкәт функцияләрен, үз – үзләренә хезмәт күрсәтү күнекмәләрен яхшыртачак, көнкүрештә мөстәкыйль булачак, өйдә физкультура белән шөгыльләнә башлаячак, үз – үзләренә, үз мөмкинлекләренә ышанычлырак булачак, өйдән чыга башлаячак һәм социаль изоляцияне җиңәчәк», – дип сөйли «Россия – мөмкинлекләр иле» милли премиясе финалисты Марат Ильясов.
Марат автор тренажерларының 12 моделен, инвалидлар һәм сәламәтлек ягыннан мөмкинлекләре чикләнгән өчен тернәкләндерү методикасын һәм программасын эшләде һәм патентлады. Аның тренажерлары Росздравнадзор тарафыннан теркәлгән һәм төрле тайпылышлы пациентларны торгызганда барлык медицина учреждениеләрендә дә кулланылырга мөмкин. Биш ел эчендә Марат Ильясов аппаратлары ярдәмендә 5000 пациент хәрәкәт активлыгын яхшырткан инде. Инженер-конструктор һәм реабилитолог белеме булган Марат үз белемнәрен эштәге төрле нечкәлекләрне исәпкә алу һәм һәр проблемага индивидуаль якын килү өчен комплекслы куллана. Өстәвенә, ул еш кына үзенең тернәкләндерү тәҗрибәсенә мөрәҗәгать итә.
«Хәзер бөтен республика мобиль поликлиникалары белән алга таба да бергәләп эшләү мөмкинлеге карала. Без тикшерүләрдән соң ук дәвалау процедуралары да булуын телибез. Апробация нәтиҗәләре буенча инде ачык булачак, әмма перспективалар зур. Россиядә һәм дөньяда мондый хәлнең булганы юк әле», - дип уртаклашты Марат Ильясов.
Марат карамагындагылар үзләре волонтерларга әвереләләр, башкаларга ярдәм итә башлыйлар. Ир-ат тарафыннан булдырылган онлайн-тренингларга Россиянең 20 шәһәреннән яшәүчеләр кушылды инде. Аның инициативасын Россия Президенты Владимир Путин һәм Татарстан Республикасы Башлыгы Рөстәм Миңнеханов хуплады. Марат проекты Татарстанның иң яхшы 10 социаль проекты һәм Россиянең иң яхшы 100 социаль проекты исемлегенә кергән.