«Созвездие-Йолдызлык» фестиваленә янәдән ЮНЕСКО эгидасы тәкъдим ителде
«Созвездие-Йолдызлык» эстрада сәнгатенең ел саен уздырыла торган ачык республика телевизион яшьләр фестиваленә быел ЮНЕСКО эшләре буенча Россия Федерациясе комиссиясе эгидасы тәкъдим ителде.
Комиссиянең җаваплы сәркәтибе Александр Алимов фестиваль хәрәкәтләрен оештыручылар адресына тиешле хат юллады.
«Әлеге инициативаның ЮНЕСКО программа приоритетларына һәм принципларына туры килүен исәпкә алып, шул исәптән әгъза - дәүләтләрнең һәм җәмгыятьләрнең тере мирасны ачыклау, саклау һәм популярлаштыру өчен потенциалын ныгыту өлешендә, чарага ЮНЕСКО эшләре буенча Россия Федерациясе комиссиясе эгидасын тәкъдим итәргә шат», - дип хәбәр итте Алимов.
Исегезгә төшерәбез, ел саен үткәрелә торган «Созвездие-Йолдызлык» ачык республика телевизион яшьләр эстрада сәнгате фестивале Татарстан Республикасында 2000 елда оештырылган һәм Татарстан Республикасы Рәисе Рөстәм Миңнеханов патронажы астында уза. Фестивальнең барлык этапларында катнашу бушлай. Бу сезонда ул 22 февральдән 24 апрельгә кадәр узачак һәм республиканың барлык шәһәр һәм районнарын колачлаячак. Фестивальнең 25 нче юбилей сезоны Бөек Ватан сугышында Җиңүнең 80 еллыгына һәм Ватанны саклаучылар елына багышлана. Быел арадаш этаплар Казанда, Түбән Камада, Яр Чаллыда, Болгарда, шулай ук Азнакай, Актаныш, Биектау, Балык Бистәсе, Тәтеш, Яшел Үзән районнарында узачак.
Республика Рәисе «Созвездие-Йолдызлык» проекты – Татарстанның һәр торак пунктына барып җитү һәм барлык талантларны табу мөмкинлеге, дип берничә тапкыр әйтте. Бу вакыт эчендә хәрәкәт мәктәбе аша 1,5 миллионга якын яшүсмер узган.
«Созвездие-Йолдызлык» – меңләгән яшь кеше өчен социаль лифт. Татарстан җитәкчелегенең иҗади элитаның киләчәк буынын формалаштыруга игътибары нәтиҗәсендә проектның йөзләгән лауреатлары Татарстан һәм Мәскәүнең әйдәп баручы югары уку йортларын тәмамлаган. Алар барысы да үз талантлары белән халыкара дәрәҗәдәге проектларны, шулай ук иң яхшы телевизион эстрада программаларын бизиләр. Ә ЮНЕСКО эгидасы безгә дөнья, рухи һәм мәдәни мирасны саклау һәм яклау өчен тәкъдим ителгән», – дип билгеләп үтте «Созвездие-Йолдызлык» фестиваленең генераль продюсеры, РФ Хөкүмәтенең мәдәният өлкәсендәге премиясе лауреаты Дмитрий Туманов.
«Созвездие-Йолдызлык» – илебезнең иң эре эстрада фестивале һәм аның мәдәниятенең күптөрлелеген чагылдыруга, шулай ук анда катнашучыларның үзара иҗади баюына хезмәт итә, балаларның профессиональ иҗади үсешенә һәм милли традицияләргә сакчыл мөнәсәбәтенә ярдәм итә, бу исә «Яшьләр һәм балалар» милли проекты максатларына туры килә.