Балалар ялы һәм гаиләләргә ярдәм: Татарстан Республикасы Яшьләр эшләре министрлыгы 2024 елның гавами максатлары турында хисап тотты
Татарстан Республикасы Яшьләр эшләре министрлыгы Татарстан Республикасы Иҗтимагый палатасында 2024 елга кабул ителгән җиде гавами максатның үтәлеше турында хисап тотты. Аларның бишесе үтәлгән, икесе өлешчә үтәлгән дип танылды.
«Татарстан Республикасы Яшьләр эшләре министрлыгының 2024 елга беренче бурычы яшьләрне хезмәттә тәрбияләүгә ярдәм итү булды. 5 мең яшь кешене республика предприятиеләрендә эш белән тәэмин итү бурычы тора иде. Максатны арттырып үти алдык. 13 меңнән артык кеше эшкә урнаштырылган», – дип сөйләде ТР Яшьләр эшләре буенча министрның беренче урынбасары Софья Галиева-Мостафина.
Икенче бурыч – эшләүче яшьләрнең потенциалын ачу. Монда һөнәри компетенцияләрне үстерүгә, иҗади һәм спортта үз-үзеңне тормышка ашыруга юнәлдерелгән проектлар белән Татарстан Республикасында эшләүче яшьләрнең кимендә 7% колачларга кирәк иде.
«Проектлар белән 8 меңнән артык кеше колачлап алынган, онлайн-форматта – 16 меңнән артык эшләүче яшьләр, шулай ук 20 меңнән артык иҗади чыгышлар тамашачысы, фестиваль һәм чараларда катнашучылар. Предприятиеләрдә яшьләр сәясәте диапазонын киңәйтү, аларның төбәк программаларына һәм проектларына кушылуы яшь хезмәткәрләрне кызыксындыруга, аларның компания эчендә һөнәри үсешенә өстәмә импульслар бирә», – дип дәвам итте Галиева-Мостафина.
Киләсе максат – җәйге ял һәм балаларны савыктыру инфраструктурасын үстерү. Төрле юнәлештәге сменалар белән 7 яшьтән 18 яшькә кадәрге 205 мең бала һәм яшьләр вәкилләрен колачлау күздә тотылган иде. 214 меңнән артык бала һәм яшүсмерне ял белән тәэмин итеп, планнарны арттырып үтәү мөмкин булды.
Россиядә Гаилә елы дип игълан ителгән 2024 елда яшь гаиләләргә ярдәм итү һәм гаилә кыйммәтләрен популярлаштыру буенча чаралар оештыру аеруча зур әһәмияткә ия булды.
«Яшь гаиләләр белән эш барлык яшьләр сәясәте учреждениеләре базасында алып барыла. 2024 елда 150 меңнән артык кешене колачлап, 1,3 меңнән артык чара үткәрелгән, бу узган ел белән чагыштырганда 78% ка күбрәк. Бу яшьләр һәм гаилә сәясәте үсешендә яңа юнәлеш турында сөйли», – дип хәбәр итте министрның беренче урынбасары.
Гавами максатлар исемлегендә яшь гаиләләр белән бәйле тагын бер бурыч бар иде – аларны торак белән тәэмин итү. Монда максатчан күрсәткеч 1 мең гаиләне тәшкил иткән, әмма аны 70% ка гына үтәп булды.
Алтынчы максат–балигъ булмаганнарны эш белән тәэмин итү. Биредә каникул чорында яшьләр сәясәте учреждениеләре базасында республикада яшәүче 14 яшьтән 17 яшькә кадәрге балаларның кимендә 50%ын эш белән тәэмин итәргә кирәк иде.
«Яшьләр сәясәте учреждениеләре базасында 14-17 яшьлек 92 меңнән артык балигъ булмаган бала мәшгульлекнең төрле рәвешләре белән тәэмин ителгән, бу гомуми санның 54,1%ын тәшкил итә. Татарстан Республикасы Яшьләр министрлыгы һәм муниципаль берәмлекләр тарафыннан яшьләр сәясәте учреждениеләре чаралары белән балигъ булмаганнар эшләре буенча бүлекчәләрдә хисапта торучы 52% яшүсмер һәм социаль куркыныч хәлдә торучыларның 56%ы тәэмин ителгән», – дип аңлатты докладчы.
Йомгаклау, җиденче бурыч мәдәни мәгърифәткә, традицияләр дәвамлылыгына, милли мәдәни кодны саклауга юнәлдерелгән проектларны оештырудан гыйбарәт иде. Күрсәткеч ике тапкырга арттырып үтәлде. Профильле чараларда 200 меңнән артык яшьләр катнашты.
