Татарстанлылар «Кызыл канәфер» акциясе буенча ветераннарга ярдәм итә алачак
10 апрельдән 22 июньгә кадәр Бөтен Россия буенча «Кызыл канәфер» акциясе узачак. Теләге булган һәркем волонтерлардан чәчәк рәвешендәге күкрәк билгесе сатып ала алачак, барлык акчалар тыл һәм сугыш хәрәкәтләре ветераннарына ярдәмгә китәчәк. Иганә суммасы теркәлмәгән. Бу хакта Татарстан Республикасы Яшьләр эшләре буенча министр урынбасары Айгөл Сабирова сөйләде.
«Кызыл канәфер» акциясе гадәттәгечә Бөек Җиңү бәйрәме алдыннан старт ала. Символны теләгән һәркем сатып ала ала. Иң мөһиме, теләсә кайсы кеше кертемнең ахыргы максаты нинди икәнен аңлый. Волонтерларны шәһәр урамнарында, паркларда һәм скверларда очратырга мөмкин булачак. Барлык җыелган акчалар ветераннарга: Бөек Ватан сугышында катнашучыларга, шул исәптән тыл хезмәтчәннәренә, балигъ булмаган концлагерь тоткыннарына һәм аларга тиңләштерелгән гражданнар категорияләренә ярдәмгә юнәлдереләчәк», - дип аңлатты Сабирова.
Шулай ук локаль конфликтлар, Төньяк Кавказдагы контртеррористик операцияләр һәм махсус хәрби операцияләр ветераннарына хәйрия ярдәме күрсәтелә.
Акциядә ел саен «Җиңү Волонтерлары» хәрәкәте активистлары һәм Татарстан Республикасының көмеш волонтерлары катнаша. Акцияне уздыру чорында якынча исәпләүләр буенча 14 400дән артык «Кызыл канәфер» билгесе тарату планлаштырыла, 11 000нән артык билге республика муниципаль берәмлекләренә тапшырылган инде. Республиканың барлык 45 муниципаль берәмлегеннән волонтерлар шәһәр урамнарында эшләячәк. Татарстанда волонтерлык эшчәнлеге «Яшьләр һәм балалар» милли проекты кысаларында гамәлгә ашырыла.
Акциянең операторы Бөек Ватан сугышында Җиңүнең 80 еллыгы төбәк волонтерлар корпусы булачак. «Кызыл канәфер» акциясе Җиңү көненә гамәлгә ашырыла торган өстенлекле чаралар составына керә.
«Безнең өчен волонтерларны иганә җыю нокталарында эшләргә әзерләү бик мөһим, шуңа күрә корпус волонтерлары актив рәвештә онлайн-укулар уза һәм 4 апрельдә без Татарстанда беренче тапкыр Казан корпусы өчен көндезге укуны гамәлгә ашырдык. Активистлар беренче ярдәм күрсәтүгә, коммуникацияләргә һәм Җиңү волонтерлары эшенең үзенчәлекләренә өйрәнделәр. Быелның беренче кварталында патриотик юнәлештә зур эш башкарылды, безнең алда быелгы чараларның бөтен комплексын лаеклы гамәлгә ашыру бурычы тора», - дип билгеләп үтте Җиңүнең 80 еллыгы төбәк волонтерлар корпусы җитәкчесе, «Татарстан Республикасы ихтыярыйлык мәгълүмат-ресурс үзәге» коммерцияле булмаган автоном оешмасының Финанс һәм оештыру эшләре секторы җитәкчесе Тимур Галәлетдинов.
Ярдәм итү өчен акчаны онлайн да, волонтерларның махсус боксларында урнаштырылган QR-кодлар ярдәмендә дә ясарга мөмкин.