Татарстан студентларын Әстерханда «Шәһәр үзгәрешләре мәктәбе» экспедициясендә катнашырга чакыралар
2026 ел сезонында «Россияне яңадан ачабыз» Бөтенроссия студентлар экспедицияләре программасы кысаларында 2026 елның 5-13 сентябрендә узачак «Шәһәр үзгәрешләре мәктәбе: Әстерхан өчен шәһәр инструментлары җыелмасы һәм пилот проектлары» студентлар экспедициясенә теркәлү ачык.
Экспедиция Россиянең төрле төбәкләреннән килгән студентларны берләштерәчәк, аларга Әстерхан шәһәр мохитен үстерүнең реаль бурычлары өстендә эшләргә туры киләчәк. Катнашучылар урбанистика, шәһәр дизайны һәм халыкны территорияләр үсешенә җәлеп итү өлкәсендәге заманча алымнар белән танышачаклар, шулай ук кыр тикшеренүләре, интервьюлар үткәрәчәкләр.
Экспедиция нәтиҗәләре буенча командалар шәһәр өчен гамәли чишелешләр: «шәһәр инструментлары җыелмасы» һәм проект паспортларын, юл карталарын, база сметаларын һәм халык алдында яклау өчен презентацияләрне үз эченә алган берничә пилот мини-проект эшләячәк.
«Россияне яңадан ачабыз» программасы «Икътисадның югары мәктәбе» Илкүләм тикшеренү университеты, «Россия — мөмкинлекләр иле» президент платформасы, «Больше, чем путешествие» Россия Яшьләре проекты һәм Рус география җәмгыяте тарафыннан гамәлгә ашырыла. Экспедициянең кабул итүче ягы булып «Территорияләрне стратегик тотрыклы үстерү үзәге» коммерцияле булмаган автоном оешмасы тора.
Экспедиция «Яшьләр һәм балалар» һәм «Яшәү өчен инфраструктура» милли проектлары максатларына туры килә, практик белем бирүне, төбәкара яшьләр алмашуын һәм Россия шәһәрләрен үстерү өчен гамәли чишелешләр эшләүне берләштерә.
Катнашуга шәһәр мохитен үстерү, архитектура, урбанистика, иҗтимагый киңлекләрне проектлау, социология, территориаль үсеш һәм чиктәш юнәлешләр мәсьәләләре белән кызыксынучы студентлар чакырыла.
Катнашуга «Россия — мөмкинлекләр иле» платформасында сылтама буенча теркәлергә мөмкин.