Яшьләр парламенты һәм Татарстан Яшьләр хөкүмәте икенче яртыеллыкка куелган максатларны билгеләделәр
Яшьләр көне алдыннан Татарстан Республикасы Яшьләр эшләре министры Азат Кадыйров Татарстан Республикасы Дәүләт Советы каршындагы Яшьләр парламенты әгъзалары һәм Татарстан Республикасы Яшьләр хөкүмәте киңәшчеләре белән очрашу үткәрде. Диалог республикада закон чыгару, иҗтимагый һәм социаль инициативаларны гамәлгә ашыручы яшь лидерларны берләштерде.
Очрашу ачык сөйләшү форматында узды: катнашучылар яшьләр институтларының эш нәтиҗәләре, 2026 елның икенче яртыеллыгына планнар, «Яшьләр һәм балалар» милли проектын гамәлгә ашыру турында фикер алыштылар, шулай ук министрга үз идеяләрен һәм проектларын тәкъдим иттеләр.
Очрашуны ачып, Азат Кадыйров мондый формат республиканың ике төп яшьләр институтының көчләрен берләштерергә мөмкинлек бирәчәген билгеләп үтте: «Бүген без мондый форматта беренче тапкыр Татарстан Республикасы Дәүләт Советы каршындагы Яшьләр парламенты һәм Татарстан Республикасы Яшьләр хөкүмәте катнашында очрашабыз. Мондый берләштерелгән форматны уздыру мөһим дип саныйм – бергәләп өстенлекле эшләр турында фикер алышу, идеяләр, бурычлар һәм планнар белән алмашу, яшьләр сәясәтен гамәлгә ашыруда эшне синхронлаштыру».
Яшьләрне федераль проектларга җәлеп итүгә аерым игътибар бирелде. Министр Россия Яшьләренең Татарстанда быел көз старт алачак «Проводники смыслов. Новые маршруты» программасын тәкъдим итте. Яшь парламентарийлар һәм киңәшчеләр командалар составына керәчәк, алар республика муниципалитетларында мәктәп укучылары һәм студентлар белән очрашулар үткәрәчәк, үз-үзләрен тормышка ашыру мөмкинлекләре турында сөйләячәк.
«Сезнең Яшьләр парламенты һәм Яшьләр хөкүмәте статусы – зур шәхси казаныш һәм сәләтләрегезнең күрсәткече генә түгел, ә мөһим иҗтимагый миссия дә – яшьләр өчен мәгънә йөртүче булу», – дип ассызыклады министр.
Очрашу барышында шулай ук активистларның Россия Яшьләре грант конкурсларында, форум кампаниясендә һәм яшьләрнең дәүләт һәм муниципаль хезмәткә кызыксынуын арттыруга юнәлдерелгән «ГосСтарт» программасында катнашуы турында фикер алыштылар. Азат Кадыйров сүзләренчә, Яшьләр парламентында һәм Яшьләр хөкүмәтендә катнашучы һәркем әлеге инструментларны үз үсеше һәм яшьтәшләрен җәлеп итү өчен кулланырга тиеш.
Министр чыгышыннан соң катнашучылар үз инициативалары турында фикер алышуга күчтеләр. Яшь лидерлар экология, ихтыярыйлар, шәһәр мохитен үстерү һәм гражданлык инициативалары өлкәсендәге проектлар белән таныштырдылар, шулай ук республикада яшьләр сәясәтен алга таба гамәлгә ашыру турында сораулар бирделәр. Әңгәмә ачык һәм конструктив булды: яклар уртак эшнең перспектив юнәлешләре турында фикер алыштылар һәм мондый очрашуларны яңа уку елы башында ук дәвам итәргә килештеләр. Яшьләр инициативаларына ярдәм итү «Яшьләр һәм балалар» милли проекты максатларына туры килә.
Бүген Татарстан Республикасы Дәүләт Советы каршындагы Яшьләр парламенты закон чыгару инициативаларын әзерләү мәйданчыгы булып тора. Төзелгәннән бирле 16 закон проекты эшләнде, шуларның берсе Татарстан Республикасы законына әверелде. 2017 елдан бирле эшләп килүче Татарстан Республикасы Яшьләр хөкүмәте социаль әһәмиятле проектларны гамәлгә ашыра һәм яшьләр белән башкарма хакимият органнары арасында бәйләүче звено булып тора, республикада яшәүче яшьләрнең инициативаларын гамәлгә ашырырга ярдәм итә.