Татарстанда «Татарстан Республикасының иң яхшы яшь галиме» конкурсында гран-при ияләрен бүләкләделәр
Яшьләр көнендә «УРАМ» экстрим-паркында «Татарстан Республикасының иң яхшы яшь галиме» республика конкурсының «Гран-при» махсус номинациясе лауреатларын бүләкләү тантанасы булды. Чара яшь тикшеренүчеләрне, фәнни җәмәгатьчелек, хакимият органнары һәм яшьләр оешмалары вәкилләрен берләштерде.
Конкурс 2010 елдан бирле үткәрелә һәм талантлы яшь галимнәргә ярдәм итүгә, фундаменталь һәм гамәли фәнне үстерүгә, шулай ук тикшеренү эшчәнлеген популярлаштыруга юнәлдерелгән. 2025 елдан Татарстан Республикасы Рәисе карары белән Фәнни-технологик үсеш елы мирасы кысаларында өстәмә финанслау белән «Гран-при» махсус номинациясе булдырылды.
Тантанада катнашучыларны Татарстан Республикасы Яшьләр эшләре министры Азат Кадыйров, «Больше чем путешествие» коммерцияле булмаган автоном оешмасы генераль директоры Олеся Брыкова һәм президент вазифаларын башкаручы – Татарстан Республикасы Фәннәр академиясе вице-президенты Алексей Тимерханов сәламләде.
Татарстан Республикасы Яшьләр эшләре министры Азат Кадыйров: «Бүген Татарстан яшьләр сәясәтен гамәлгә ашыруда алдынгы урыннарда тора, һәм безнең иң мөһим бурычларыбызның берсе – талантлы яшь галимнәр үз идеяләрен нәкъ менә монда тормышка ашыра алырлык шартлар тудыру. Фән – Республиканың һәм илнең технологик үсешенең нигезе ул, шуңа күрә яшь тикшеренүчеләргә ярдәм итү безнең өстенлегебез булып кала».
Конкурста абсолют җиңүче һәм Гран-при иясе булып техник фәннәр докторы, Казан дәүләт архитектура-төзелеш университетының Төзелеш производствосы технологиясе кафедрасы профессоры Рөстәм Мөхәммәтрахимов танылды. Ул лауреат дипломы һәм 500 мең сум күләмендә акчалата премия алды.
Икенче урынны һәм 350 мең сум күләмендә премияне медицина фәннәре докторы, Казан федераль университетының «Ген һәм күзәнәк технологияләре» НИЛ Openlab баш фәнни хезмәткәре Яна Мөхәммәдшина алды.
Өченче урынны техник фәннәр кандидаты, Казан дәүләт архитектура-төзелеш университетының Металл конструкцияләр һәм корылмаларны сынау кафедрасы доценты Ришат Гайнетдинов алды. Премия күләме 250 мең сум тәшкил иткән.
2025 елда конкурска Татарстан Республикасының югары уку йортлары, фәнни оешмалары һәм предприятиеләре яшь галимнәреннән һәм аспирантларыннан 190 гариза килгән. Көндезге этапка 35 иң көчле катнашучы чыкты, алар үзләренең фәнни проектларын эксперт жюрисына тәкъдим иттеләр.
Конкурс Татарстан Республикасында фән һәм технологияләрнең унъеллыгын уздыру планы кысаларында Татарстан Республикасы Яшьләр эшләре министрлыгы, Татарстан Республикасы Мәгариф һәм фән министрлыгы, Татарстан Республикасы Фәннәр академиясе һәм «Татнефть» гавами акционерлык җәмгыяте ярдәмендә гамәлгә ашырыла. Мондый чараларны үткәрү «Яшьләр һәм балалар» милли проекты максатларына туры килә. Оештыручы булып Татарстан Республикасы яшь галимнәренең һәм белгечләренең төбәк иҗтимагый хәрәкәте тора.