Татарстанда яшьләр арасында наркоманияне профилактикалауда яңа мәсьәләләр турында фикер алыштылар
Халыкара наркотиклар куллануга һәм аларның законсыз әйләнешенә каршы көрәш көнендә «Татар-информ» мәгълүмат агентлыгы мәйданчыгында наркоманияне кисәтү һәм яшьләрне җинаятьчел эшчәнлеккә җәлеп итүдән яклауга багышланган матбугат конференциясе узды.
Очрашуда Татарстан Республикасы Яшьләр эшләре министры урынбасары Руслан Семенов, Республика клиник наркология диспансеры баш табибы урынбасары Резеда Хаева, Татарстан Республикасы буенча Эчке эшләр министрлыгының Наркотиклар әйләнешен контрольдә тоту идарәсе бүлеге башлыгы Әнвәр Кәримов һәм Татарстан Республикасы прокуратурасының Балигъ булмаганнарның хокукларын үтәүне күзәтү бүлеге башлыгы Александр Цеханович катнашты.
Татарстан Республикасы Яшьләр эшләре министры урынбасары Руслан Семенов яшьләр белән профилактик эш турында сөйләде. «Наркотикларсыз тормыш» айлыгы кысаларында республикада 15 меңгә якын кешене колачлаган 200дән артык чара уздырылды: «Бүген яшьләр белән аңлаешлы телдә сөйләшү мөһим. Нәкъ менә шуңа күрә Эчке эшләр министрлыгы, прокуратура һәм Җәзаларны үтәү федераль хезмәте идарәсе белән берлектә без наркотикларның законсыз әйләнеше белән бәйле җинаятьләр өчен иректән мәхрүм итү урыннарына эләккән яшь кешеләрнең реаль тарихларына нигезләнгән «За пределом» документаль фильмын әзерләдек. Бу «җиңел акча» бәясе һәм ялгыш сайлау нәтиҗәләре турында гадел сөйләшү».
Ул ассызыклаганча, яшьләр белән эш кисәтүгә генә түгел, бәлки үз-үзеңне тормышка ашыру, үсеш һәм сәламәт яшәү рәвеше өчен мөмкинлекләр тудыруга да корылырга тиеш.
Республика клиник наркология диспансеры баш табибы урынбасары Резеда Хаева наркоманиянең кешенең физик һәм психик сәламәтлегенә кагыла торган, шулай ук социаль бәйләнешләрне җимерә торган авыр хроник чир булып калуын билгеләп үтте: «Теләсә нинди наркотик – ул агу. Күпләр беренче яки икенче кулланудан соң туктый алачагына ышана, әмма бәйлелек акрынлап формалаша: башта психологик, аннары физик. Шуңа күрә бүген төп бурыч – куллануның беренче тәҗрибәсен кисәтү, ә профилактика беренче чиратта гаиләдә башлана».
Ул хәбәр иткәнчә, Татарстанда дәвалау, тернәкләндерүне үз эченә алган наркоманнарга ярдәм итү комплекслы системасы эшли. 2026 елның беренче кварталы нәтиҗәләре буенча республикада наркомания таралышы 2,6% ка кимегән, шул ук вакытта диспансер исәбендә 10 299 кеше тора. Беренче яртыеллыкта 6 меңгә якын мәктәп укучысы профилактик медицина тикшерүе узган, 4,6 меңнән артык укучыда наркотиклар куллану очраклары ачыкланмаган.
Татарстан Республикасы буенча Эчке эшләр министрлыгының Наркотиклар әйләнешен контрольдә тоту идарәсе бүлеге башлыгы Әнвәр Кәримов сүзләренә караганда, 2026 елның биш аенда республикада наркотикларның законсыз әйләнешенә бәйле меңнән артык җинаять ачыкланган, аларның 73% сатуга бәйле җинаятьләрне тәшкил итә: «Бүген җинаятьчеләр яшьләрне наркотикларның законсыз әйләнешенә җәлеп итү өчен интернеттан актив файдалана. Яшүсмерләргә тиз акча эшләргә вәгъдә итәләр, нәтиҗәләре турында әйтмиләр. Без мондый җинаятьләргә чик куярга һәм бер үк вакытта профилактик эш алып барырга тиеш, яшьләр наркотиклар саткан өчен җәза котылгысыз икәнен аңласыннар өчен».
Ул шулай ук хәбәр иткәнчә, ел башыннан наркоҗинаятьләргә катнашы булган 22 балигъ булмаган бала тоткарланган. Законсыз әйләнештән 110 килограммнан артык наркотик матдә алынган.
Татарстан Республикасы прокуратурасының Балигъ булмаганнарның хокукларын үтәүне күзәтү бүлеге башлыгы Александр Цеханович наркотикларга каршы көрәш профилактика механизмнарын даими яңартуны таләп итә, дип ассызыклады: «Җинаятьчеләр яшүсмерләрне җәлеп итү ысулларын үзгәртә, шуңа күрә профилактика системасы да үз вакытында җайлашырга тиеш. Әмма барлык ведомстволарның эше нинди генә нәтиҗәле булмасын, гаилә катнашыннан башка нәтиҗәгә ирешеп булмый. Нәкъ менә ата-аналар беренчеләрдән булып баланың үз-үзен тотышындагы үзгәрешләрне күрергә һәм вакытында бәла-казаны булдырмый калырга мөмкин».
Ул шулай ук яшүсмерләрнең мәшгульлеген үстерү, спорт, өстәмә белем алу һәм балигъ булмаганнарны вербовкалау өчен кулланыла торган интернет-ресурсларны даими мониторинглау зарурлыгына игътибарны юнәлтте.
Матбугат конференциясендә катнашучылар фикеренчә, наркоманияне нәтиҗәле кисәтү хакимият органнары, хокук саклау структуралары, мәгариф системасы, медицина җәмәгатьчелеге, ата-аналар, иҗтимагый оешмалар һәм массакүләм мәгълүмат чаралары көчләрен берләштергәндә генә мөмкин. Бары тик комплекслы якын килү генә яшьләрне наркотикларны законсыз әйләнешкә кертүдән сакларга һәм киләчәк буыннарның сәламәтлеген сакларга сәләтле. Яшьләр арасында профилактик чараларны гамәлгә ашыру «Яшьләр һәм балалар» милли проекты максатларына туры килә.