Дмитрий Чернышенко һәм Азат Кадыйров «Яшь гвардия» спорт-сәламәтләндерү лагеренда булдылар
Татарстан Республикасына эш сәфәре барышында Россия Хөкүмәте Рәисе урынбасары Дмитрий Чернышенко кабул итү һәм җәйге балалар сәламәтләндерү кампанияләренең барышын, шулай ук университет, көллият һәм лагерь инфраструктурасын бәяләде.
«Яшь гвардия» лагеренда вице-премьер һәм Яшьләр эшләре министры Азат Кадыйров җәйге балаларны савыктыру кампаниясе барышы турында фикер алыштылар, инфраструктураны бәяләделәр, 16 июньнән 3 июльгә кадәр уза торган «Геройлар вакыты» сменасында катнашучылар белән аралаштылар. Анда Казанның спорт мәктәпләре укучылары, шул исәптән махсус хәрби операция хәрбиләренең балалары катнаша.
«Балалар ялы системасын үстерү – төп өстенлекләрнең берсе. Президентыбыз Владимир Владимирович Путин кушуы буенча «Яшьләр һәм балалар» милли проекты кысаларында без балалар өчен шартлар тудырабыз. Сүз ял итү турында гына түгел, үсеп килүче буынны тәрбияләү, аларның иҗади үсеше һәм талантларын тормышка ашыру турында да. Татарстан Республикасының «Яшь гвардия» лагеренда ел әйләнәсе ял итү, сәламәтләндерү һәм спорт белән шөгыльләнү өчен менә дигән инфраструктура бар. Балаларга куелган максатларга ирешүләрен һәм спортта һәм тормышта югары урыннарга омтылуларын телим»,-дип мөрәҗәгать итте «Геройлар вакыты» сменасында катнашучыларга вице-премьер.
Татарстан Республикасы Яшьләр эшләре министры хәбәр иткәнчә, 2019 елдан 2025 елга кадәр капиталь ремонт буенча республика программасы нәтиҗәсендә 50дән артык балаларны сәламәтләндерү лагере, ә 2026 елда 10нан артык балаларны сәламәтләндерү лагере ремонтланган. Агымдагы елда 560 кеше сыйдырышлы «Следопыт» лагеренда капиталь ремонт тәмамланган. Тәрбия эшенә аерым игътибар бирелә.
«Бүген җәй көне һәр баланың файдалы эш белән тәэмин ителүе мөһим – бу лагерьлар, яшьләр үзәкләре, спорт җыеннары, белем бирү һәм иҗади программалар. Капиталь ремонттан соң «Яшь гвардия» шундый заманча киңлекләрнең берсенә әверелде. Яңарту нәтиҗәсендә лагерь 280 кеше сыйдыра, ял итү һәм спорт белән шөгыльләнү өчен уңайлы шартлар тудырыла. Смена вакытында яшьләр үзләрен футболда, баскетболда, тимераякта шуу спортында, җиңел атлетикада сынап карый алалар. Алар белән спорт мәктәпләренең хәзерге тренерлары эшли. Мондый алым һәр баланың сыйфатлы ялын, сәламәтләнүен һәм үсешен бергә алып барырга мөмкинлек бирә», - дип ассызыклады Азат Кадыйров.
«Яшь гвардия» лагере – Казандагы иң борынгы балалар лагерьларының берсе. Ул 1932 елда төзелгән, ә 2021-2023 елларда капиталь ремонт буенча республика программасы буенча тулысынча яңартылган.
